Yurtimizda ziyorat safariga boruvchi fuqarolar uchun katta qulaylik yaratildi — “Haj va Umra yagona portali” deb nomlangan yangi elektron platforma ishga tushirildi.
Endilikda fuqarolar haj yoki umra ziyoratida ishtirok etish uchun arizalarni onlayn ravishda yuborish imkoniyatiga ega bo‘lishadi. Yangi tizimning asosiy maqsadi — ro‘yxatga olish jarayonini qulay, shaffof va inson aralashuvisiz amalga oshirishdir.
Portal orqali haj safariga borishni istaganlar uchun yagona elektron navbat shakllantiriladi. Shu tariqa arizalarni qabul qilish va ko‘rib chiqish jarayoni to‘liq avtomatlashtiriladi.
Eng muhim jihati — fuqarolar endi uylaridan chiqmasdan turib, zarur hujjatlarni taqdim etib ariza topshirishlari mumkin. Bu orqali turli idoralarga borish, qog‘ozbozlik yoki ortiqcha byurokratik jarayonlardan o‘tish ehtiyoji yo‘qoladi.
Arizalarni yuborish uchun ikki qulay yo‘l mavjud:
– Yagona interaktiv davlat xizmatlari portali — my.gov.uz orqali;
– Yoki maxsus veb-sayt — haj-umra.gov.uz orqali.
Ushbu yangi tashabbus nafaqat ziyoratchilar uchun qulaylik yaratadi, balki navbat tizimini adolatli va avtomatik tarzda boshqarishni ham ta’minlaydi.
Shu tariqa, O‘zbekistonda ziyorat safariga borish jarayoni zamonaviy texnologiyalar yordamida yanada oson va ochiq bo‘ldi.
“Zamin”ni Telegramʻda oʻqing!
