Toshkent shahrining Yangihayot tumanida dam olishga kelgan erkak ikki ayolga nisbatan shahvoniy shilqimlik qilgani uchun ma’muriy javobgarlikka tortildi. Bu haqda sud hujjati orqali ma’lum bo‘ldi.
Ma’lumotlarga ko‘ra, 14 oktyabr kuni “Yangi turmush” mahallasida yashovchi Z.F. yomon tush ko‘rgani uchun uni “o‘qib berishi” mumkin bo‘lgan tanish ayol orqali M.A. ismli erkakni uyiga chaqirgan.
Ayolning tanishi M.A. xizmatini “tushni o‘qib berish” deb ta’riflab, Z.F. unga 3,6 million so‘m to‘lashi kerakligini aytgan. Ammo xonadonga kelgan erkak ilgari uning jiyaniga, keyin esa o‘ziga nisbatan noma’qul harakatlar qilib, o‘pmoqchi bo‘lgan.
Qo‘rqib ketgan Z.F. darhol huquq-tartibot idoralariga murojaat qilgan.
21 oktyabr kuni Yangihayot tuman sudida ish ko‘rib chiqildi. Sudda M.A. qilgan ishini tan olgan va pushaymonligini bildirgan.
Sud uni Ma’muriy javobgarlik to‘g‘risidagi kodeksning 41-1-moddasi (“Shahvoniy shilqimlik qilish”) bo‘yicha aybdor deb topib, 5 sutkaga ma’muriy qamoq jazosi tayinladi.
Mutaxassislar fuqarolarni begona shaxslarni uyga chaqirishda ehtiyotkor bo‘lishga va har qanday noodatiy holatda huquq-tartibot idoralariga zudlik bilan murojaat qilishga chaqiradi.
“Zamin”ni Telegramʻda oʻqing!
