Turkiyaning "Oila bu sinov" (Aile Bir Imtihandir) nomli yangi dramasi 2025–2026 yilgi mavsumning eng kutilayotgan loyihalaridan biri sifatida tilga olinmoqda. Serial oilaviy rishtalardagi murakkabliklar, o‘tmish jarohatlari va axloqiy tanlovlar mavzusini markazga olib chiqadi. Bu haqda kursiv.uz xabar beradi.
Ma’lumotlarga ko‘ra, loyiha ATV telekanalida namoyish etilishi rejalashtirilgan. Premyera sanasi 2026 yil 13 yanvar etib belgilangan, ko‘rsatuv haftasiga bir marta prime-time’da efirga uzatiladi. Teledasturdan keyin qismlar telekanalning raqamli platformalarida ham paydo bo‘lishi kutilmoqda.
Hikoya markazida Dogan ismli muvaffaqiyatli jarroh turadi. U yillar avval o‘z oilasi bilan aloqalarni uzib, tug‘ilib o‘sgan yurtidan uzoqda karyera qilishni tanlagan. Biroq muhim bir oilaviy voqea sabab u qaytishga majbur bo‘ladi va aynan shu paytdan boshlab o‘tmish yana eshik qoqadi.
Qaytish Dogan uchun eski ranjlar, yashirin sirlar va hal bo‘lmagan mojarolar zanjirini ishga tushiradi. Tashqaridan ahil ko‘ringan oila aslida juda nozik tizim ekani ayon bo‘ladi: har bir qahramonning o‘z haqiqatlari ham, o‘z ayblari ham bor.
Serial davomida shaxsiy muvaffaqiyat bilan oilaviy burch to‘qnashuvi, an’analar bosimi va qarindoshlar kutgan talablar, shuningdek o‘tmishdan uzilishning qimmat bahosi izchil ochib boriladi.
Asosiy rollarni taniqli turk aktyorlari ijro etishi aytilmoqda. Shuningdek, ikkinchi plandagi qahramonlar — Doganning ota-onasi, aka-ukalari va opa-singillari — voqealar rivojiga kuchli ta’sir ko‘rsatadigan obrazlar sifatida taqdim etiladi.
Loyiha OGM Pictures studiyasi tomonidan ishlab chiqarilayotgani qayd etilgan. Ssenariy va rejissura emotsional ohang, yirik dialoglar hamda qahramon xarakterlarini sekin-asta ochib borishga urg‘u berishi bilan ajralib turadi. Serial uzoq muddatli hikoya sifatida rejalashtirilgani, asosiy e’tibor esa qahramonlarning ichki o‘zgarishlariga qaratilishi bildirilgan.
“Zamin”ni Telegramʻda oʻqing!
