“Manchester Yunayted”da navbatdagi muhim qaror qabul qilindi. Klub rasman Maykl Kerrik jamoa bosh murabbiyi lavozimiga tayinlanganini e’lon qildi. Ma’lum qilinishicha, 44 yoshli mutaxassis “qizil iblislar”ni mavsum yakuniga qadar boshqaradi.
Bu tayinlov Ruben Amorim bilan hamkorlik to‘xtatilganidan keyingi vaziyatga nuqta qo‘ydi. Amorim ishdan ketgach, jamoani ikki uchrashuvda Darren Fletcher vaqtincha boshqarib turgan edi. Endi esa rahbariyat “ko‘p o‘ylab o‘tirmay”, ishni Kerrikka topshirdi — klub ichida muhitni yaxshi biladigan, bosimni his qila oladigan, fanatlar ham “begona” deb qabul qilmaydigan nom.
Jamoaning hozirgi holati qanday?
APLning 21-turidan keyin “Manchester Yunayted” 32 ochko jamg‘argan va ayni paytda 7-o‘rinda bormoqda. Bu pozitsiya hali Yevromusobaqalar uchun umid qoldiradi, lekin klub maqsadlari bilan solishtirganda — albatta, kam. Shu bois, Kerrikning oldidagi vazifa aniq: natijani to‘g‘ri yo‘lga qo‘yish, jamoani qayta “tiriltirish” va mavsumni imkon qadar yuqori o‘rinda yakunlash.
Kerrikka ishonishyaptimi?
Maykl Kerrik “Yunayted” muhitini ichidan ko‘rgan inson: klub ruhiyatini, bosimini, talabini biladi. Shuning uchun ham bu tayinlov “vaqtinchalik variant” bo‘lsa-da, amalda jamoani yig‘ib olish uchun mos qarorga o‘xshaydi.
Qisqasi, “Old Trafford”da yangi sahifa ochildi. Endi eng qizig‘i — Kerrik jamoaga nimani o‘zgartirib bera oladi? Muxlislar esa bitta narsani kutayapti: “Yunayted”ni yana o‘sha “qo‘rqinchli” klubga aylantirish.
“Zamin”ni Telegramʻda oʻqing!
