Oʻzbekiston Prezidenti Shavkat Mirziyoyev mamlakatning yangi investitsiya siyosati ustuvor yoʻnalishlarini eʼlon qildi. 2026 yilgacha Oʻzbekiston 50 milliard dollar miqdorida xorijiy sarmoyalarni jalb qilishni rejalashtirmoqda.
Davlat rahbari har bir dollar sarmoya nafaqat loyiha moliyalashtirishga, balki ilgʻor texnologiyalarni oʻzlashtirish, yuqori qoʻshilgan qiymatga ega mahsulotlar ishlab chiqarishga yoʻnaltirilishi kerakligini taʼkidladi. Strategik investorlar uchun maxsus qoʻllab-quvvatlash choralarini koʻrish rejalashtirilgan.
Xususan, loyihalarni amalga oshirish uchun yer uchastkalari toʻgʻridan-toʻgʻri bozor qiymatida ajratiladi. Yer toifasi oʻzgartirilganda, yerning toʻliq foydalanilmagan qismiga toʻlovni boʻlib-boʻlib toʻlash imkoniyati beriladi.
Shuningdek, jarayonlarni soddalashtirish uchun “yagona darcha” tamoyili asosida elektron platforma ishga tushiriladi. Ushbu platforma orqali investorlar yer ajratish, uning toifasini oʻzgartirish, qurilish ruxsatnomalari olish va infratuzilmaga ulanish kabi masalalarni turli idoralarga murojaat qilmasdan hal qilishlari mumkin.
Bu tizimga barcha tegishli vazirlik va idoralar ulanishi belgilangan.
Mehmon guruhidagi foydalanuvchilar ushbu nashrga izoh qoldira olmaydi.
