Fransiya chempionatida 1-turdan keyin kutilmagan voqea yuz berdi. “Marsel” jamoasi tarkibidan fransuz yarim himoyachisi Adriyen Rabo hamda Jonatan Rou vaqtinchalik ravishda chetlatildi. Bu qaror “Renn” bilan kechgan uchrashuvdan keyin qabul qilindi. Ma’lumki, o‘yin yakunida Rabo va Rou o‘rtasida kelib chiqqan tortishuv jiddiy oqibatlarga olib keldi.
Har ikki futbolchiga jamoa rahbariyati tomonidan intizomiy chora qo‘llandi. Ular faqat asosiy tarkibdan chetlatilibgina qolmay, balki transfer ro‘yxatiga ham qo‘yildi. Bu holat futbol jamoatchiligida katta muhokamaga sabab bo‘ldi.
Ayniqsa, Adriyen Raboning onasi Veronik Rabo bu qarorga o‘z munosabatini bildirdi. Uning ta’kidlashicha, o‘g‘li uchun bunday munosabat juda og‘ir bo‘lgan.
— Uning chetlatilgani haqida eshitganimda, bu men uchun katta zarba bo‘ldi. Rostdan ham o‘zimni noqulay his qildim. Chunki o‘g‘lim “Marsel” uchun juda ko‘p ish qildi. Biroq klub unga nisbatan shunday yo‘l tutdi. Adriyenning jahli chiqmayapti, ammo u juda xafa, — dedi Veronik Rabo “RTL” telekanaliga bergan intervyusida.
Uning so‘zlariga ko‘ra, u ilgari PSJdagi davrni Rabo uchun eng og‘ir payt deb o‘ylagan. Ammo bu safar yana shunga o‘xshash vaziyat yuz berishi xavotir uyg‘otmoqda.
— Agar o‘g‘lim butun mavsumni o‘tkazmay qolsa, bu haqiqiy falokat bo‘ladi. Biz bu kabi holatni avval ham ko‘rganmiz va uning yana takrorlanishini xoxlamaymiz, — dedi futbolchining onasi.
Shu tariqa, “Marsel”da yuz bergan mojaro ortidan Raboning kelajagi noaniq ko‘rinishda qolmoqda. Muxlislar esa uning transfer bozorida qaysi klubga yo‘nalishi mumkinligini qiziqish bilan kuzatmoqdalar.
