Angliya Premyer-ligasining 18-tur markaziy uchrashuvida Londonning «Chelsi» klubi «Aston Villa»ga 1:2 hisobida imkoniyatni boy berdi. Unai Emeri jamoasi ikkinchi bo'limda bosimni kuchaytirib, Olly Uotkinsning dubliga tayanib kambek qayd etdi. Bu haqda kursiv.uz xabar beradi.
«Stemford Brij»da mezbonlar uchrashuvni ancha ishonchli boshladi va tashabbusni qo'lda ushlab turdi. «Chelsi»ning ustunligi burchak zarbasidan keyin Juaun Pedru kiritgan gol bilan natijaga ko'chdi. Birinchi taym to'liq londonliklar nazoratida o'tgan bo'lsa-da, hisob minimal darajada qoldi.
Tanaffusdan so'ng vaziyat keskin o'zgardi: «Aston Villa» o'yin sur'atini oshirdi va Robert Sanches darvozasi oldida tez-tez xavfli epizodlar yaratishga kirishdi. O'yin taqdiri asosan bir soat atrofidan keyingi bo'lakda hal bo'ldi — Emerining almashtirishlari mehmonlar pressingini yanada kuchaytirdi.
Avvaliga Uotkins Morgan Rodjersning uzatmasidan so'ng to'pni ilib ketib, hisobni tenglashtirdi. Oradan ko'p o'tmay, hujumchi yana bir bor o'z so'zini aytdi: Yuri Tilemans uzatgan burchak zarbasidan keyin bosh bilan aniq zarba yo'llab, dublni rasmiylashtirdi. Aynan shu gol «Aston Villa»ga g'alabani taqdim etdi.
Uchrashuv yakunida «Chelsi» mag'lubiyatdan qutulish uchun bosimni kuchaytirdi, biroq Emiliano Martines darvoza chizig'ida ishonchli harakat qildi. «Aston Villa» o'yinni g'alaba bilan yakunlab, yuqori o'rinlar uchun kurashdagi barqarorligini yana bir bor tasdiqladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
