Mashhur futbolchi va tajribali murabbiy Andrey Kanchelskis asnews.kz sayti so‘roviga javob berar ekan, Qozog‘iston futbolidagi hozirgi vaziyatni chuqur tahlil qildi hamda uni qo‘shni O‘zbekistondagi holat bilan ochiqcha taqqosladi. Mutaxassisning fikricha, ikki mamlakat futboli o‘rtasidagi farq yildan yilga yanada yaqqol sezilmoqda.
Kanchelskis ta’kidlashicha, Qozog‘iston bilan solishtirganda, o‘zbek futboli so‘nggi yillarda juda katta sakrashni amalga oshirgan.
— O‘zbekiston rivojlanish yo‘lida uzoq masofani bosib o‘tdi. Eng asosiysi, aynan O‘zbekiston birinchi bo‘lib jahon chempionatiga chiqdi. Bundan tashqari, Abduqodir Husanov kabi futbolchilar Angliya Premer-ligasida o‘z so‘zini ayta boshladi. Ha, Qozog‘istonda ham iqtidorli o‘yinchilar bor, ammo u yerda tizimli rivojlanishga to‘sqinlik qilayotgan muammolar juda ko‘p, — dedi u.
Infratuzilma — asosiy farq
Mutaxassis fikricha, O‘zbekiston futbolining asosiy ustunligi — infratuzilma
— O‘zbekistonda infratuzilma postsovet hududida, ehtimol, eng yaxshisi. Eng muhimi, u yerga haqiqiy futbolni tushunadigan odamlar keldi. Ular maydonlar, akademiyalar, bolalar va o‘smirlar futboliga sarmoya kiritishni boshlashdi. Men O‘zbekistonda mamnuniyat bilan ishlaganman. U yerda hamma futbolning rivojlanishidan manfaatdor, — deya ta’kidladi Kanchelskis.
Uning so‘zlariga ko‘ra, Qozog‘istonda islohotlar taklif etilsa, ko‘pincha ularga shubha bilan qaraladi.
— Biz muayyan tashabbuslarni aytganimizda, odamlar go‘yo biz bu infratuzilmani cho‘ntagimizga solib ketamiz, deb o‘ylashadi. “Bu nimaga kerak o‘zi?” degan savollar ko‘p, — dedi murabbiy.
Maydonlar muammosi
Kanchelskis Qozog‘istondagi maydonlar sifatiga ham keskin baho berdi.
— U yerda normal o‘ynash qiyin. Sun’iy qoplamali maydonlar bilan futbolni rivojlantirish emas, aksincha, o‘ldiryapsiz. Masalan, Qo‘stanayda ikkita maydon bor: biri tabiiy, ikkinchisi manejdagi sun’iy maydon. Bu holat o‘yin sifatiga jiddiy ta’sir qiladi, — dedi u.
Mutaxassis mamlakatda yangi stadionlar qurish rejalari borligini inkor etmadi, biroq bu ish faqat qog‘ozda qolib ketmasligi kerakligini urg‘uladi.
— Bitta stadion allaqachon topshirildi. Lekin keyin nima bo‘ladi? Qog‘ozda istalgancha loyiha chizish mumkin, amaliy ish esa boshqa masala, — deya qo‘shimcha qildi u.
Qiziqish o‘smoqda, ammo…
Shu bilan birga, Kanchelskis Qozog‘istonda futbolga qiziqish oshib borayotganini ham tan oldi.
— Terma jamoa va "Qayrat"ning ayrim muvaffaqiyatlari fonida muxlislar soni ko‘paydi. Bu ijobiy holat, ammo barqaror taraqqiyot uchun tizimli yondashuv shart, — dedi u.
Katta tajriba egasi
Eslatib o‘tamiz, Andrey Kanchelskis futbolchilik faoliyati davomida "Manchester Yunayted", "Manchester Siti", "Everton", "Sautgempton", "Reynjers", "Fiorentina" va "Al-Hilol" kabi mashhur jamoalarda to‘p tepgan. U ikki karra Angliya va Shotlandiya chempioni bo‘lgan, “Manchester Yunayted” safida qator nufuzli sovrinlarni qo‘lga kiritgan.
Murabbiy sifatida esa u O‘zbekistonda ikki bor "Navbahor" jamoasini boshqargan, Qozog‘istonda "Tobol" klubida bosh direktor lavozimida ishlagan. Ayni paytda esa Rossiyaning "Dinamo Bryansk" jamoasida bosh murabbiy sifatida faoliyat olib bormoqda.
Qisqasi, Kanchelskisning fikrlari bir narsani ochiq ko‘rsatadi: zamonaviy futbolda natija tasodif bilan emas, infratuzilma, ishonch va to‘g‘ri strategiya bilan qo‘lga kiritiladi. O‘zbekiston bu yo‘ldan o‘tib ulgurdi, Qozog‘iston esa hali jiddiy qarorlar oldida turibdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
