Fransiya Liga 1ning 17-turi doirasidagi poytaxt derbisida PSJ “Parij”ni 2:1 hisobida magʻlub etib, uchrashuvdagi favorit maqomini amalda ham tasdiqladi. Mezbonlar ilk daqiqalardanoq tashabbusni qoʻlga olib, toʻp nazoratini ishonchli ushlab turdi, mehmonlar esa uzoq vaqt zich mudofaa evaziga bosimga bardosh berdi. Bu haqda kursiv.uz xabar beradi.
Tanaffus arafasida “Parij” markazda yoʻl qoʻygan xato qimmatga tushdi: PSJ vaziyatdan unumli foydalanib, Dezire Due aniq yakun bilan hisobni ochdi.
Ikkinchi bo‘limda oʻyin kutilmaganda keskinlashdi. “Parij” penalti ishlab oldi va Villem Gebbel uni ishonch bilan golga aylantirdi. Biroq durang uzoq saqlanib qolmadi: Usmon Dembele rikoshetdan keyin paydo bo‘lgan imkoniyatdan foydalanib, PSJni yana oldinga olib chiqdi.
Shundan soʻng Luis Enrike jamoasi uchrashuv ritmini pasaytirib, vaziyatni toʻliq nazorat qildi va raqibga bosim uyushtirish imkonini bermadi. Tribunadagi muxlislar derbidagi gʻalabani yakuniy hushtak yangramasidan avvalroq nishonlashga ulgurdi.
Ushbu uch ochko PSJga chempionat peshqadamidan ortda qolayotgan farqni qisqartirishga yordam berdi. “Parij” esa Liga 1dagi gʻalabasiz seriyasini davom ettirdi.
“Zamin”ni Telegramʻda oʻqing!
