8-yanvar kuni soat 05:02 da (Toshkent vaqti bilan) A Seriyaning 19-turi doirasida «Inter» safarda «Parma»ni 2:0 hisobida mag‘lub etdi. Ushbu natija Milan klubiga turnir jadvalidagi birinchi o‘rinni saqlab qolish va raqiblardan qulay farqni ushlab turish imkonini berdi.
Uchrashuv boshidan «Inter» to‘p nazoratini va o‘yin tezligini qo‘liga oldi. Mezbonlar esa past blokda himoyalanib, raqibning xatolaridan foydalanishga urinib ko‘rdi. «Neradzurrilar» qanotlar orqali bosimni tizimli oshirib, vaziyat izlashda davom etdi va tanaffus arafasida buning samarasini ko‘rdi.
Hisobni Dimarko ochdi: u chap qanotdan hujumga qo‘shilib, yaqin burchakka aniq zarba berdi. To‘p ustunga tegib, darvozabon Korvi qo‘riqlayotgan darvozadan joy oldi.
Ikkinchi bo‘limda «Parma» hujumda tajovuzni kuchaytirishga harakat qildi, biroq «Inter» to‘pni ko‘proq ushlab turib, o‘yin ritmini pasaytirdi. Milanliklar vaziyatni shoshirmay, hisobni nazorat qilgan holda o‘ynadi.
Qo‘shimcha daqiqalarda mehmonlar qarshi hujumga chiqdi. Avvaliga kiritilgan bir gol VAR orqali qo‘l bilan o‘yin qayd etilgani sabab bekor qilindi. Oradan ko‘p o‘tmay, Barella Tyuramga aniq uzatma berdi, hujumchi yakkama-yakka vaziyatdan unumli foydalanib, yakuniy hisobni belgiladi.
A Seriya. 19-tur. 7 yanvar
Parma — Inter 0:2
Gollar: Dimarko (42), Tyuram (90+8).
Parma — Korvi, Britsji, Sirsati, Ondreyka (Ordonez, 62), Bernabe (Esteves, 75), Valeri, Del-Prato, Keyta (Kremaski, 86), Oristanio (Almkvist, 62), Pellegrino (Kutrone, 75), Serensen.
Inter — Zommer, Suchich (Barella, 69), Akanji, Bissek, Dimarko, Augusto, Enrike (Acherbi, 85), Martines (Bonni, 85), Mxitaryan, Chalxono‘g‘li (Zelinski, 69), Espozito (Tyuram, 79).
G‘alabadan so‘ng «Inter» 42 ochko jamg‘arib, peshqadam bo‘lib qoldi. «Parma» esa 18 ochko bilan 15-o‘rinda bormoqda.
“Zamin”ni Telegramʻda oʻqing!
