«Manchester Siti» Angliya Premer-ligasining 20-turida «Chelsi»ni qabul qildi va uchrashuv 1:1 hisobida yakunlandi. Mezbonlar 42-daqiqada Tijani Reyndersning zarbasi orqali oldinga chiqdi, ammo 90+4-daqiqada Enso Fernandes so‘nggi lahzada hisobni tenglashtirdi. «Siti» uchun 90+4 — xuddi “spoyler”dek: 3 ochko qo‘lda edi, keyin bir zumda uchib ketdi.
Uchrashuv «Chelsi» uchun ham alohida fonga ega bo‘ldi: klub Enso Mareska bilan yo‘llar ajrashganini rasman e’lon qilgan, jamoani esa vaqtincha bosh murabbiy sifatida Kalum Makfarleyn boshqargani qayd etildi.
Abduqodir Husanov maydonga 51-daqiqada qo‘shildi — u jarohat olgan Yoshko Gvardiol o‘rniga tushdi. Uchrashuv davomida Gvardiol bilan birga Ruben Diash ham muammolar tufayli almashtirildi.
Eng muhokamali epizodlardan biri esa ikkinchi bo‘lim o‘rtalaridan keyin bo‘ldi: sobiq «Siti» tarbiyalanuvchisi Liam Delap Husanovni reklama to‘sig‘i tomon turtib yubordi va bu kichik “jang”ga aylanib ketdi. Natijada Delap ham, Mateush Nunesh ham sariq kartochka oldi.
E’tiborlisi, «Manchester Siti»ning rasmiy hisobotida ham Delapning Husanovni to‘siqqa uchirib yuborgani va bu harakat uchun ogohlantirilgani alohida tilga olingan.
EKSPERT BAHOLARI (esteemedkompany.com):
Janluiji Donnarumma — 7/10:
Bitta ajoyib seyvni amalga oshirdi va “Chelsi”ning javob golini oldini olishda deyarli hech narsa qila olmadi.
Mateush Nunesh — 7,5/10:
Nuneshdan raqib hujumkor futbolchisi Pedro Netuga qarshi yana bir ishonchli o‘yin.
Ruben Diash — 7/10:
Ruben Diashning yana bir barqaror chiqishi. Himoyada ishonchli o‘ynadi va jamoasi o‘yinini qo‘llab-quvvatlab turdi.
Yoshko Gvardiol — 6,5/10:
Afsuski, Gvardiol jarohat oldi va 50-daqiqada almashtirildi. Shu paytgacha u yaxshi o‘ynayotgan edi. Uning jarohati juda jiddiy emas, deb umid qilinmoqda.
Niko O’Rayli — 6,5/10:
Kerak bo‘lgan paytlarda himoyada yaxshi harakat qildi va yakkakurashlarda g‘alaba qozondi. Hujumda esa u qadar yaxshi ko‘rinmadi, chunki charchagandek edi. Afsuski, O’Rayli Malo Gustoga qarshi hal qiluvchi yakkakurashda yutqazdi, bu esa “Chelsi”ning o‘yin oxiridagi javob goliga olib keldi. Bu O’Rayli uchun o‘yin so‘ngidagi qattiq saboq bo‘ldi.
Rodri — 9/10:
Rodridan ajoyib o‘yin. U to‘p bilan ham, to‘psiz ham juda yuqori darajada harakat qildi. Rodri “Manchester Siti” futbolchilari orasida eng yuqori baho oldi.
Tijani Reynders — 7,5/10:
Reyndersning goli juda chiroyli bo‘ldi, ammo umuman olganda, uning o‘yini ham ekspertlarga ma’qul keldi. U “Siti”ga to‘p nazoratida ustunlik qilishga yordam berdi va Premer-ligada o‘ynash uchun nima kerakligini yaxshi tushunadigan futbolchi ekani ko‘rinib turibdi.
Bernardu Silva — 7/10:
Bernardu Silvadan yana bir professional o‘yin. U jamoa manfaati uchun bor kuchini berdi.
Rayan Sherki — 6/10:
Sherki uchun eng yaxshi o‘yin emas. Ayrim paytlarda u to‘pni haddan ortiq ushlab qoldi, texnikasi esa qoniqarli emas edi.
Fil Foden — 6/10:
Fodendan yana bir omadsiz o‘yin. U qaror qabul qilishda xatolar qildi va charchagan futbolchidek ko‘rindi.
Erling Xoland — 6,5/10:
Xoland to‘pni ustunga tekkizdi va o‘z imkoniyatlariga ega bo‘ldi. Afsuski, u gol ura olmadi va bu hal qiluvchi omilga aylandi.
Zaxiradan tushganlar:
Abduqodir Husanov — 7/10:
Ekspertlarning fikricha, Husanov almashuvdan keyin ajoyib o‘ynadi. U Liam Delap tomonidan bo‘lgan xavfni yaxshi bartaraf etdi va ishonchli o‘yin ko‘rsatdi. Ancha faol harakat qildi.
Jeremi Dok-u — 6/10:
Yorqin lahzalar bo‘ldi, ammo u o‘yinga o‘zi istagandek ta’sir o‘tkaza olmadi.
“Zamin”ni Telegramʻda oʻqing!
