Kuvaytda o‘tgan Fransiya Superkubogi uchun bahs haqiqiy trillerga aylandi. Fransiya chempionati va kubogi g‘olibi «PSJ» mamlakat vitse-chempioni «Marsel» bilan to‘qnash keldi va o‘yin oxirigacha asablarni “sinovdan o‘tkazdi”.
Uchrashuvning boshidayoq parijliklar tezlikni oshirdi. 13-daqiqada Usmon Dembele hisobni ochib, «PSJ»ga erta ustunlik olib berdi. Shundan keyin ham «PSJ» o‘yinni nazorat qilishga urindi, ammo «Marsel» taslim bo‘lmadi — Roberto De Zerbi jamoasi ikkinchi taymda umuman boshqa kayfiyatda maydonga qaytdi.
«Marsel» kambeki va yutuqqa yaqinlik
76-daqiqada Meyson Grinvud penaltidan aniq zarba yo‘llab, hisobni tenglashtirdi — 1:1. Oradan ko‘p o‘tmay, 87-daqiqada dramatik epizod yuz berdi: Pacho avtogol muallifiga aylanib, «Marsel»ni hisobda oldinga olib chiqdi — 1:2.
Shu paytda «Marsel» irodali g‘alabaga juda yaqin kelgandi. Lekin futbol shunday: oxirgi hushtakkacha “bo‘ldi” degan gap yo‘q.
90+5: Ramush sahnaga chiqdi
Parijliklar so‘nggi daqiqalarda barcha kuchni hujumga tashladi. Va 90+5-daqiqada Gonsalu Ramush gol urdi — 2:2! Shu gol «PSJ»ni penaltilar seriyasiga olib chiqdi va o‘yinni “lotereya”ga aylantirdi.
Penaltilarda Shevale — hal qiluvchi omil
Penaltilar seriyasida «PSJ» 4:1 hisobida ustun keldi. Bu yerda asosiy qahramonlardan biri — Shevale: u 2 ta seyv amalga oshirib, Luis Enrike jamoasiga navbatdagi sovrin eshigini ochib berdi.
Shu tariqa «PSJ» o‘z tarixida 14-bor mamlakat Superkubogini qo‘lga kiritdi — finalda dramatik ssenariy, oxirida esa parijliklarga xos “oxirigacha kurash” g‘alabasi.
Fransiya superkubogi
PSJ — Marsel 2:2
Penaltilar seriyasi — 4:1
8 yanvar. Kuvayt. Xalqaro stadion
Gollar: Dembele (13), Ramush (90+5) — Grinvud (76, penalti), Pacho (87, avtogol).
PSJ: Shevale, Vitinya, Dembele, Due, Zair-Emeri (Mayulu, 89), Kvaratsxeliya (Barkolya, 72), Markinos, Mendesh, Nevesh, Pacho, Ruis (Ramush, 89).
Marsel: Rulli, Balerdi, Vea (Murillo, 72), Grinvud (O’Rayli, 90+2), Guiri (Obameng, 67), Kondogbia, Medina, Pavar, Payshao (Traore, 67), Hyoyberg, Emerson.
Ogohlantirishlar: Vea (48), Hyoyberg (53), Zair-Emeri (63), Medina (86), Obameyang (89).
“Zamin”ni Telegramʻda oʻqing!
