«Lion» bosh murabbiyi Paulu Fonseka joriy mavsumdagi ishlaridan mamnunligini bildirib, jamoa hozir bir vaqtning o‘zida uchta turnirda ham barqaror va ishonchli o‘yin ko‘rsatayotganini ta’kidladi. Klub barcha musobaqalarda ketma-ket 13 ta g‘alabadan iborat ajoyib seriya qayd etdi. Bu haqda euro-football.ru xabar beradi.
Fonsekaning aytishicha, jamoa sovrinlar yutishga ham tayyor, ham bunga qodir, biroq buni amalga oshirish oson emas. Murabbiy Liga 1dagi to‘rtinchi mavsumini o‘tkazayotganini eslatib, aynan shu yilgi chempionat raqobat bo‘yicha eng qiyinlaridan biri ekanini qayd etdi. Shunga qaramay, u futbolchilarning ambitsiyasi, jamoaning ish uslubi va tarkibning doimiy ravishda o‘sishga intilishini yuqori baholadi.
Mutaxassis «Lion» bu mavsumda kutilmagan katta syurprizga aylanishi mumkinligini ham qo‘shimcha qildi. U mavsum startidagi muammolar va jamoa duch kelgan qiyinchiliklarni unutmaslikka chaqirib, ayni paytda klub imkon qadar eng yaxshi sport formasida ekanini aytdi. Fonseka uchun eng muhim mezon — mavsum qanday yakunlanishi va yakunda alohida bir tarix yozish imkoniyati.
Ayni damda «Lion» Fransiya chempionatida uchinchi o‘rinda bormoqda. Shuningdek, jamoa Yevropa Ligasi umumiy bosqichini birinchi pog‘onada yakunlab, pley-offda kurashni davom ettiradi.
“Zamin”ni Telegramʻda oʻqing!
