Saudiya Arabistoni chempionatining shanba kungi uchrashuvida «Al-Feyha» va «Al-Nasr» to‘qnash keldi. Turnir peshqadami bo‘lib turgan Ar-Riyod klubi ko‘plab noqulay vaziyatlarga qaramay, safarda zo‘rg‘a bo‘lsa-da uch ochkoni olib ketdi. Bu haqda euro-football.ru xabar beradi.
Bahs boshida Krishtianu Ronaldu penalti tepdi, biroq to‘p pastdan chap ustunga tegib maydonni tark etdi. Birinchi bo‘lim yakunida esa mezbonlar kutilmaganda hisobni ochdi: o‘ng qanotdan uzatilgan to‘pni darvozabon ilib olishga chiqqan paytda, o‘z himoyachisi Abdulela al-Amri oyog‘i bilan to‘pni yaqin burchakka kesib yubordi — 1:0.
Ikkinchi bo‘limda «Al-Nasr» bosimni oshirdi. Joau Felishning jarima maydonidan zarbasini himoyachilar to‘sdi, qaytgan to‘pga Ronaldu 15 metrlar atrofidan tepadan yo‘llagan zarbani darvozabon qaytardi. 72-daqiqada esa hisob tenglashdi: Sulton al-G‘anamning uzoq pasidan keyin Kingsli Koman jarima maydoniga kirib uzatma berdi, Sadio Mane esa bemalol yakunlab qo‘ydi — 1:1.
Shundan so‘ng «Al-Nasr»da bir nechta qulay imkoniyatlar bo‘ldi, lekin gol urish darhol nasib etmadi: Ayman Yahyo yakkama-yakka vaziyatda darvozabonni aldolmadi, Komaning uzoq burchakka yo‘llagan zarbasi ham posbon tomonidan seyv qilindi. 80-daqiqada Marselo Brozovich burchakdan uzatdi, to‘p Felishga kelib tushdi va u 20 metrlar atrofidan yaqin ustunga tekkizgan zarbasi darvozabonning ortidan darvoza chizig‘idan o‘tdi — 1:2.
Yakuniy nuqtani 85-daqiqada «Al-Nasr» qo‘ydi: Felish bilan kombinatsiyadan so‘ng Abdulloh al-Hamdan jarima maydonida to‘pni qabul qilib, 8 metrlar atrofidan aniq zarba berdi — 1:3.
Natijada «Al-Feyha» turnir jadvalida 11-o‘rinni bo‘lishib turibdi. «Al-Nasr» esa peshqadamlikni saqlab qoldi va eng yaqin ta’qibchidan 2 ochko oldinda bormoqda.
“Zamin”ni Telegramʻda oʻqing!
