2009 yil oktabrida Qozonning «Rubin» jamoasi Chempionlar ligasida katta shov-shuv ko'targan: «Kamp Nou»da «Barselona»ni 2:1 hisobida mag'lub etgandi. O'sha uchrashuvda to'p surgan sobiq yarimhimoyachi Kristian Noboa o'sha natija uchun berilgan bonuslar miqdorini esladi. Bu haqda euro-football.ru xabar beradi.
Ekavadorlik futbolchining aytishicha, bu uning faoliyatidagi eng yirik mukofot pullaridan biri bo'lgan. «Har bir o'yinchi 80 ming dollar oldi», — deya Noboaning so'zlarini keltiradi «Sport-Ekspress».
Noboa bu pulni shoshilinch xarajatlarga sarflamaganini ham ta'kidladi: u mablag'ni jamg'armaga olib qo'ygan, chunki o'shanda ham vazminroq yigit bo'lganini aytadi.
Eslatib o'tamiz, 2009/2010 yilgi Chempionlar ligasi guruh bosqichida «Rubin» o'z kvartetida uchinchi o'rinni egallagan. Guruhda «Barselona» va «Inter» yuqoriroq pog'onalarda yakunlagan, Kiyevning «Dinamo»si esa so'nggi o'rinda qolgan.
“Zamin”ni Telegramʻda oʻqing!
