Xitoyning «XPeng Motors» kompaniyasi rahbari He Syaopen yangilangan «XPeng P7» elektromobili Ginnesning rekordlar kitobiga kiritilganini rasman e'lon qildi. Avtomobil nam yo'lda to'xtovsiz drift qilish bo'yicha o'ziga xos natija qayd etdi. Bu haqda Ixbt.com xabar beradi.
Sinov davomida elektromobil boshqariladigan sirpanish holatida 73,594 kilometr masofani bosib o'tdi. Mazkur jarayon 1 soat 33 daqiqa davom etgan bo'lib, avtomobil Suchjou shahridagi maxsus poligonning 216 ta aylanasini muvaffaqiyatli yakunladi.
Poligon yuzasi muzlagan yoki qorli yo'llarni simulyatsiya qiluvchi maxsus keramika bilan qoplangan bo'lib, uning tishlashish koeffitsiyenti 0,3 ga teng edi. Kompaniya vakillarining ta'kidlashicha, ushbu test shassi va elektr tizimlarining barqarorligini tekshirish uchun xizmat qildi.
Yangi «XPeng P7» modeli sirpanchiq yo'llarda favqulodda manevr qilishga yordam beruvchi AES faol xavfsizlik tizimi bilan jihozlangan. «Xiaomi» asoschisi Ley Szyun ham ushbu muvaffaqiyat bilan «XPeng» jamoasini ommaviy ravishda tabrikladi.
Ma'lumot uchun, 2026 yilgi «XPeng P7+» modeli ham taqdim etilgan bo'lib, uning elektr versiyasi 725 kilometrgacha, gibrid varianti esa 1550 kilometrgacha masofa bosib o'tish imkoniyatiga ega.
“Zamin”ni Telegramʻda oʻqing!
