"Bavariya" Said El Malani transfer qilish uchun asosiy da'vogarga aylandi
"Brayton" klubi "Kyoln" yulduzi Said El Mala uchun kurashni to'xtatgach, Myunxenning "Bavariya" jamoasi 19 yoshli iqtidor uchun asosiy da'vogarga aylandi. Ingliz klubi taklif qilgan 35 million yevro "Kyoln"ni qoniqtirmadi, chunki nemislar o'z tarbiyalanuvchisi uchun kamida 50 million yevro talab qilmoqda. Hozirda futbolchiga "Chelsi" va "Nyukasl" kabi jamoalar ham qiziqish bildirayotgan bir paytda, "Bavariya" uni tarkibni kuchaytirish uchun eng maqbul variant sifatida ko'rmoqda. El Malaning manfaatlari endilikda nufuzli "CAA Stellar" agentligi tomonidan himoya qilinishi yozgi transfer oynasida yirik kelishuv amalga oshishidan dalolat beradi.
Germaniyaning "Kyoln" klubi yulduzi Said El Mala uchun kurashda kutilmagan burilish yuz berdi. Shu vaqtga qadar asosiy da'vogar bo'lib kelgan "Brayton" transfer poygasini tark etdi. Bu haqda Goal.com xabar beradi.
Bu holat Myunxenning "Bavariya" klubiga 19 yoshli iqtidor egasini qo'lga kiritish uchun qulay imkoniyat yaratdi.
Ma'lumotlarga ko'ra, Angliya klubi va futbolchining oilasi o'rtasida og'zaki kelishuvga erishilgan edi. Biroq "Brayton" tomonidan taklif qilingan 35 million yevro "Kyoln" rahbariyatini qoniqtirmadi.
Nemis klubi o'z tarbiyalanuvchisi uchun kamida 50 million yevro talab qilmoqda.
Hozirda El Malaga "Chelsi" va "Nyukasl" klublari ham jiddiy qiziqish bildirmoqda. "Bavariya" esa futbolchini Luis Diasga raqobatchi sifatida ko'rmoqda.
Myunxenliklar ayni damda Entoni Gordon variantini ham ko'rib chiqmoqda, biroq uning narxi 80 million yevrodan balandligi transferni qiyinlashtirishi mumkin.
Muzokaralar muvaffaqiyatsiz yakunlangach, El Mala oilasi professional yordam olishga qaror qildi. Endilikda futbolchining ishlarini Fermin Lopes va Eduardo Kamavinga kabi yulduzlar bilan ishlaydigan "CAA Stellar" agentligi yuritadi.
Bu qadam yozgi transfer oynasida yirik bitim amalga oshishidan dalolat beradi.
Izohlar 0
…