Oʻzbekiston Superligasida qiziq tur: derbilar va intriga kutilmoqda
O‘zbekiston Superligasining 10-turi qiziqarli derbi va prinsipial to‘qnashuvlarga boy bo‘lishi kutilmoqda. Turning markaziy o‘yinlari sifatida "Paxtakor" – "Nasaf" qarama-qarshiligi hamda "Neftchi" va "Qo‘qon-1912" jamoalari o‘rtasidagi Farg‘ona derbisini alohida ta’kidlash lozim. Shuningdek, murabbiyi almashgan "Mash’al"ning "Buxoro"ga qarshi bahsi va "Bunyodkor" – "Navbahor" uchrashuvi ham muxlislarda katta qiziqish uyg‘otmoqda. Mazkur turdagi har bir o‘yin turnir jadvalidagi o‘rinlar uchun muhim ahamiyatga ega bo‘lib, murosasiz kurash va kutilmagan natijalarni va’da qilmoqda.
Oʻzbekiston Superligasida 10-tur start olmoqda va bu galgi tur muxlislar uchun haqiqiy futbol bayramiga aylanishi kutilmoqda. Bir qator derbilar, prinsipial toʻqnashuvlar va kutilmagan natijalar ehtimoli — hammasi bor. Demak, bu turni oʻtkazib yuborish — oʻzingga qarshi ishlash bilan teng.
27 aprel kuni dastlabki oʻyinlarda «OKMK» va «Lokomotiv» oʻzaro kuch sinashadi. Mirjalol Qosimov shogirdlari mavsumni qiyin boshlagan boʻlsa-da, soʻnggi turlarda oʻzini tiklab oldi — 4 oʻyindan beri magʻlubiyat yoʻq. «Loko» esa raqibidan ikki ochko ustun. Toshkent derbisi har doim kutilmagan ssenariyga boy boʻladi.
Shu kuni «Mashʼal» — «Buxoro» bahsi ham diqqat markazida. 9 turdan beri yutqazayotgan muborakliklar nihoyat murabbiyni almashtirdi. Endi jamoani Eldor Sakayev boshqaradi. Yangi nafas bera oladimi yoki seriya davom etadimi — asosiy savol shu.
28 aprel kuni «Andijon» oʻz maydonida «Dinamo»ni qabul qiladi. «Burgutlar»da oʻyin asta-sekin joyiga tushmoqda, natijalar ham yaxshilanmoqda. «Dinamo» esa hali barqarorlikni topa olgani yoʻq. «Bobur arena»dagi atmosfera esa alohida shou boʻlishi aniq.
«Soʻgʻdiyona» — «Surxon» qarama-qarshiligida esa ehtiyotkor futbol kutish mumkin. Jizzaxliklar himoyada muammolarga ega, ammo har bir ochko ular uchun oltinga teng.
Turning markaziy oʻyini — «Paxtakor» va «Nasaf» toʻqnashuvi. «Ajdarlar»da yetakchilar ketishi taʼsir qilmoqda, «sherlar» esa oʻz uslubida barqaror. Sobiq «nasaf»chilarning yangi jamoasi tarkibida “Ajdarlar”ga qarshi oʻyini alohida intriga qoʻshadi.
29 aprel kuni Fargʻona derbisi — «Neftchi» va «Qoʻqon-1912» oʻrtasidagi bahs ham katta qiziqish uygʻotadi. Bu oʻyinda favorit — maydon egalari, lekin derbida logika har doim ham ishlamaydi.
«Qizilqum» — «Xorazm» uchrashuvi esa mutlaqo teng raqiblar oʻyini. Har ikki jamoa 12 ochkodan jamgʻargan — demak, har qanday natija real.
Turni «Bunyodkor» — «Navbahor» bahsi yakunlaydi. Moliyaviy muammolarga qaramay, «qaldirgʻochlar» kurashmoqda. Ammo «Navbahor» — jiddiy raqib. Bu oʻyinda hujumlar va emotsiyalar yetarli boʻlishi aniq.
Qisqacha aytganda, bu tur — drayv, derbi va dramalar miksi. Futbol bor joyda syurpriz bor. Demak, ekrandan uzoqlashmang.
Izohlar 0
…