Oʻzbekistonda 28 apreldan 4 mayga qadar ob-havo sharoiti keskinlashishi kutilmoqda. Mutaxassislar maʼlumotiga koʻra, yomgʻirlar kuchayishi ortidan respublika boʻylab, ayniqsa togʻ oldi va togʻli hududlarda sel va suv-toshqini xavfi ortadi.
Xususan, Qashqadaryo, Surxondaryo, Samarqand, Navoiy, Jizzax, Toshkent, Namangan, Fargʻona va Andijon viloyatlarining qator tumanlarida tabiiy ofatlar yuzaga kelish ehtimoli yuqori baholanmoqda. Ayrim hududlarda kuchli jala yomgʻirlari natijasida sel oqimlari, suvning koʻtarilishi va hatto mahalliy toshqinlar kuzatilishi mumkin.
Jumladan:
- Qashqadaryo viloyati: Yakkabog‘, Dehqonobod, Chiroqchi, Kitob, Shahrisabz, Qamashi, Gʻuzor tumanlarida;
- Surxondaryo viloyati: Sariosiyo, Uzun, Oltinsoy, Denov, Boysun, Sherobod, Shoʻrchi, Qumqoʻrgʻon, Muzrobot tumanlarida;
- Samarqand viloyati: Urgut, Samarqand, Bulungʻur, Nurobod, Qoʻshrabot, Kattaqoʻrgʻon, Payariq, Jomboy, Ishtixon tumanlarida;
- Navoiy viloyati: Xatirchi, Navbahor, Nurota, Konimex, Karmana tumanlarida;
- Jizzax viloyati: Zomin, Baxmal, Gʻallaorol, Sharof Rashidov, Forish, Yangiobod tumanlarida;
- Toshkent viloyati: Ohangaron, Boʻstonliq, Parkent, Piskent, Oʻrtachirchiq, Yuqorichirchiq tumanlarida va Angren, Olmaliq shaharlarida;
- Namangan viloyati: Pop, Kosonsoy, Chortoq, Chust, Namangan, Yangiqoʻrgʻon tumanlarida;
- Fargʻona viloyati: Soʻx, Shohimardon, Fargʻona, Beshariq tumanlarida;
- Andijon viloyati: Andijon, Asaka, Jalaquduq, Qoʻrgʻontepa, Paxtaobod, Izboskan, Xoʻjaobod, Marhamat tumanlarida va Xonabod shahrida sel-suv toshqin hodisalari yuzaga kelishi mumkin.
Sinoptiklar taʼkidlashicha, ayniqsa togʻli joylarda suv oqimlari tez shakllanadi va qisqa vaqt ichida xavfli darajaga yetishi mumkin. Bu esa yoʻllarda harakatlanishni qiyinlashtirishi, baʼzi hududlarda infratuzilmaga zarar yetkazishi ehtimolini oshiradi.
Shu bilan birga, pastlik va shahar hududlarida ham yomgʻir suvlarining toʻplanishi kuzatilishi mumkin. Bu holat ayrim joylarda koʻchalarni suv bosishiga olib kelishi mumkin.
Oʻzgidromet aholini ehtiyotkor boʻlishga chaqirmoqda. Ayniqsa togʻli hududlarda yashovchilar, dam oluvchilar va haydovchilardan xavfsizlik choralarini oldindan koʻrish tavsiya etilmoqda.
Qisqacha aytganda, tabiat yana “rejasini” oʻzgartirmoqda. Shuning uchun bu kunlarda hushyorlik — eng yaxshi himoya.
“Zamin”ni Telegramʻda oʻqing!
