AQShning Colossal Biosciences biotexnologiya kompaniyasi yoʻqolib ketgan turlarni qayta tiklash loyihasi doirasida sunʼiy muhitda joʻjalarni muvaffaqiyatli oʻstirdi. Tajriba davomida 3D-printerda chop etilgan va tabiiy tuxum qobigʻini imitatsiya qiluvchi maxsus qolipdan foydalanildi. Natijada 26 ta sogʻlom joʻja dunyoga keldi. Bu haqda Ixbt.com xabar beradi.
Kompaniya bosh direktori Ben Lammning taʼkidlashicha, ushbu texnologiya kelajakda Yangi Zelandiyada yashagan va qirilib ketgan ulkan moa qushini qayta tiklash uchun xizmat qiladi. Moa tuxumlari tovuq tuxumidan 80 barobar katta boʻlgani sababli, ularni tabiiy yoʻl bilan inkubatsiya qilish imkonsiz. Olimlar tovuq tuxumining tarkibini sunʼiy qolipga koʻchirib, embrion rivojlanishi uchun zarur boʻlgan kalsiyni qoʻshib borishdi.
Biroq, ilmiy hamjamiyat ushbu yutuqqa nisbatan skeptik munosabatda. Buffalo universitetining evolyutsion biologiya professori Vinsent Linch bu tizimni toʻliq sunʼiy tuxum deb atash notoʻgʻri ekanligini taʼkidladi. Uning soʻzlariga koʻra, bu shunchaki rivojlangan sunʼiy qobiq boʻlib, u embrionning oziqlanishi va chiqindilarni chiqarib tashlashi uchun zarur boʻlgan barcha biologik organlarni oʻz ichiga olmaydi.
Ekspertlar, shuningdek, yoʻqolib ketgan turlarni qayta tiklashning etik va ekologik oqibatlari haqida ogohlantirmoqda. Bioetik Artur Kaplan qayta tiklangan jonivorlarning bugungi oʻzgargan ekotizimda yashab ketishi qiyin boʻlishini taʼkidladi. Shunga qaramay, Colossal Biosciences jamoasi muhandislik muammolarini bosqichma-bosqich hal etishda davom etmoqda.
“Zamin”ni Telegramʻda oʻqing!
