АҚШнинг Колоссал Биоссиенсес биотехнология компанияси йўқолиб кетган турларни қайта тиклаш лойиҳаси доирасида сунъий муҳитда жўжаларни муваффақиятли ўстирди. Тажриба давомида 3D-принтерда чоп этилган ва табиий тухум қобиғини имитация қилувчи махсус қолипдан фойдаланилди. Натижада 26 та соғлом жўжа дунёга келди. Бу ҳақда Ixbt.com хабар беради.
Компания бош директори Бен Ламмнинг таъкидлашича, ушбу технология келажакда Янги Зеландияда яшаган ва қирилиб кетган улкан моа қушини қайта тиклаш учун хизмат қилади. Моа тухумлари товуқ тухумидан 80 баробар катта бўлгани сабабли, уларни табиий йўл билан инкубация қилиш имконсиз. Олимлар товуқ тухумининг таркибини сунъий қолипга кўчириб, эмбрион ривожланиши учун зарур бўлган кальцийни қўшиб боришди.
Бироқ, илмий ҳамжамият ушбу ютуққа нисбатан скептик муносабатда. Буффало университетининг эволюцион биология профессори Винсент Линч бу тизимни тўлиқ сунъий тухум деб аташ нотўғри эканлигини таъкидлади. Унинг сўзларига кўра, бу шунчаки ривожланган сунъий қобиқ бўлиб, у эмбрионнинг озиқланиши ва чиқиндиларни чиқариб ташлаши учун зарур бўлган барча биологик органларни ўз ичига олмайди.
Экспертлар, шунингдек, йўқолиб кетган турларни қайта тиклашнинг этик ва экологик оқибатлари ҳақида огоҳлантирмоқда. Биоэтик Артур Каплан қайта тикланган жониворларнинг бугунги ўзгарган экотизимда яшаб кетиши қийин бўлишини таъкидлади. Шунга қарамай, Колоссал Биоссиенсес жамоаси муҳандислик муаммоларини босқичма-босқич ҳал этишда давом этмоқда.
“Zamin”ни Telegram'да ўқинг!
