Rossiyada ilk bor Quyosh tojini suratga olishga qodir boʻlgan ixcham kosmik observatoriya ishlab chiqilmoqda. Mazkur loyiha Rossiya Fanlar akademiyasining Kosmik tadqiqotlar instituti (IKI RAN) hamda "Geoskan" kompaniyasi tomonidan Fan va oliy taʼlim vazirligi koʻmagida amalga oshirilmoqda. Bu haqda Ixbt.com xabar beradi.
16U formatidagi sunʼiy yoʻldoshni 2026-yilda tayyorlab, keyingi yili orbitaga chiqarish rejalashtirilgan. Uning asosiy vazifasi Quyosh chaqnashlari va toj massasining otilib chiqishini kuzatishdan iborat. Bu maʼlumotlar kosmik ob-havoni oldindan bashorat qilishda muhim ahamiyat kasb etadi.
Loyihaning eng murakkab jihati shundaki, Quyosh toji nurlanishi ultrabinafsha va rentgen diapazonlarida boʻlib, ularni Yerdan kuzatish imkonsiz. Mutaxassislar maxsus optik tizimlar, filtrlar va aniq yoʻnaltiruvchi qurilmalarni atigi 25 × 25 × 50 sm oʻlchamdagi korpusga joylashtirishlari kerak.
Ushbu tashabbus, shuningdek, taʼlim maqsadlarini ham koʻzlaydi. IKI RAN va LETI ishtirokida kosmik texnologiyalar sohasida 30 ga yaqin mutaxassis tayyorlanishi rejalashtirilgan. Agar loyiha muvaffaqiyatli yakunlansa, bu Quyoshni kuzatish boʻyicha arzonroq va ommaviy kosmik missiyalar uchun yangi imkoniyatlar eshigini ochadi.
“Zamin”ni Telegramʻda oʻqing!
