Google kompaniyasi oʻzining yangi Gemini 3.5 Flash sunʼiy intellekt modelini taqdim etdi. Mazkur model dasturlash va avtonom agentlar bilan ishlashda kompaniyaning eng kuchli yechimi sifatida baholanmoqda. Yangi texnologiya shunchaki savollarga javob berish bilan cheklanmay, murakkab vazifalarni rejalashtirish, kod yozish va hatto operatsion tizimlarni noldan yaratish qobiliyatiga ega. Bu haqda Techcrunch.com xabar beradi.
DeepMind bosh texnologi Koray Kavukcuoglu taʼkidlashicha, Gemini 3.5 Flash oʻzidan oldingi Gemini 3.1 Pro modelini deyarli barcha koʻrsatkichlar boʻyicha ortda qoldiradi. Modelning asosiy ustunligi uning tezligidadir: u boshqa ilgʻor modellardan toʻrt barobar, optimallashtirilgan versiyasi esa 12 barobar tezroq ishlaydi. Bu tezlik bir vaqtning oʻzida bir nechta agentlar ishlashi talab etiladigan murakkab jarayonlar uchun juda muhim.
Taqdimot davomida Google muhandislari Antigravity platformasi yordamida agentlarning mustaqil ravishda dasturiy komponentlarni yaratib, ularni yagona tizimga birlashtirganini namoyish etishdi. Antigravity 2.0 dasturi aynan agentlar uchun moʻljallangan muhit boʻlib, u sunʼiy intellektga oʻz ishini bajarish uchun qulay maydon taqdim etadi.
Hozirgi kunda Gemini 3.5 Flash moliyaviy tashkilotlar va maʼlumotlar tahlili bilan shugʻullanuvchi jamoalar tomonidan faol sinovdan oʻtkazilmoqda. Garchi model bir necha soat davomida avtonom ishlashga qodir boʻlsa-da, muhim qarorlar qabul qilish yoki ruxsat talab etiladigan bosqichlarda u inson aralashuvini soʻraydi. Kelgusida chiqishi kutilayotgan Gemini 3.5 Pro modeli bilan birgalikda ular yanada samarali tizimni tashkil etadi.
“Zamin”ni Telegramʻda oʻqing!
