Amazon корпорацияси ChatGPT чатботини ишлаб чиқаётган OpenAI компаниясига 10 миллиард доллар миқдорида инвестиция киритиш имкониятини кўриб чиқмоқда. Бу ҳақда Reuters манбаларига таяниб хабар берди. Айни пайтда томонлар ўртасидаги музокаралар бошланғич босқичда бўлиб, келишувнинг аниқ шартлари ҳали расман тасдиқланмаган.
Маълумотларга кўра, OpenAI ўз қийматини 1 триллион долларгача баҳолаб, IPO — акцияларни оммавий жойлаштиришга тайёргарлик кўраётганини билдирган. Агар битим амалга ошса, OpenAI Amazon’нинг Trainium номли махсус сунъий интеллект чипларини харид қилиб, нейрон тармоқларни ўқитиш жараёнида қўллаши мумкин.
Айни вақтда ушбу чиплар Databricks, Ricoh ва NinjaTech AI каби йирик технологик компаниялар томонидан фаол ишлатилаётгани қайд этилмоқда. Бу эса Amazon’нинг сунъий интеллект инфратузилмасини бозорда фаол илгари сураётганидан далолат беради.
Шу билан бирга, OpenAI ChatGPT’нинг корпоратив версиясини Amazon’га таклиф қилиш масаласини ҳам ўрганмоқда. Бироқ ҳозирча чатботни Amazon’нинг маркетплейси ёки хизматлар тизимига тўлиқ интеграция қилиш бўйича аниқ қарор қабул қилинмаган.
Эслатиб ўтамиз, аввалроқ Microsoft OpenAI’да 27 фоиз улушни сотиб олган ва чатбот моделларини ўзининг булутли платформалари орқали мижозларга эксклюзив тақдим этиш ҳуқуқини қўлга киритган эди. Бу эса сунъий интеллект бозоридаги рақобат янада кескинлашаётганини кўрсатмоқда.
Экспертлар фикрича, агар Amazon ҳам OpenAI’га йирик сармоя киритса, глобал AI бозорида кучлар нисбати янги босқичга чиқиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
