АҚШ Президенти Доналд Трамп Америка қўшма штатлари ҳудудига кириш бутунлай ман этилган мамлакатлар рўйхатини сезиларли даражада кенгайтирди. Оқ уй томонидан сешанба, 16 декабрь куни эълон қилинган расмий ҳужжатга кўра, 2026 йил 1 январдан эътиборан кучга кирадиган янги чекловлар 20 та давлат ва ҳудудни қамраб олади. Шу тариқа, Вашингтон томонидан қўлланаётган ушбу чоралар доираси икки бараварга ортди.
Тўлиқ тақиқ остидаги давлатлар
Янги фармонга мувофиқ, қуйидаги мамлакатлар фуқаролари учун АҚШ дарвозалари тўлиқ ёпилади:
- Буркина-Фасо, Лаос, Мали, Нигер, Сурия, Сьерра-Леоне ва Жанубий Судан.
Шунингдек, Фаластин миллий маъмурияти томонидан берилган йўл ҳужжатлари (паспортлари) эгаларига ҳам Америкага кириш тақиқланади.
Қисман чекловлар жорий этилган мамлакатлар
АҚШ маъмурияти хавфсизлик талаблари ва маълумот алмашиш тизимидаги камчиликлар сабабли яна қатор давлатларга нисбатан қисман чекловлар ўрнатди:
- Ангола, Антигуа ва Барбуда, Бенин, Габон, Гамбия, Доминикан Республикаси, Замбия, Зимбабве, Кот-д’Ивуар, Малави, Мавритания, Нигерия, Сенегал, Танзания ва Тонга.
Расмий баёнотда таъкидланишича, ушбу кескин чоралар шахсни текшириш ва терроризмга қарши ахборот алмашиш жараёнларида доимий муаммоларга эга давлатларга нисбатан қаратилган.
Туркманистон учун "Енгиллик"
Вашингтон Туркманистон фуқаролари учун муайян имтиёзлар тақдим этди. Хусусан, ноиммиграцион визалар бўйича чекловлар бекор қилинди. Бироқ, иммиграцион визалар берилишини тўхтатиб туриш ўз кучида қолди. Бу қарор Ашхободнинг АҚШ билан шахсни аниқлаш тизимларини такомиллаштириш борасидаги "самарали ҳамкорлиги" натижаси сифатида баҳоланмоқда.
Тарихий жараён: Трамп ва Байден сиёсати
Доналд Трамп ўзининг илк президентлик даврида ҳам Куба, Эрон, Ливия, Шимолий Корея, Сомали ва Яман каби давлатларга тақиқ қўйган эди. Жо Байден ҳокимиятга келгач, бу қарорларни бекор қилганди.
Бироқ, Оқ уйга қайтган Трамп 2025 йил июнь ойида чекловларни яна тиклади. Ўшанда Афғонистон, Ҳаити, Мьянма ва Конго каби 19 та давлат рўйхатга олинганди. Эътиборли жиҳати, ўша пайтда на Шимолий Корея, на Сурия бу рўйхатдан жой олмаган эди.
Доналд Трамп баёноти: "Биз кириш тақиқини қайта тиклаймиз ва радикал террорчиларнинг мамлакатимизга киришига асло йўл қўймаймиз. Бу чора аввал ҳам АҚШда терактларнинг олдини олишда ўта муваффақиятли бўлган."
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
