АҚШ президенті Дональд Трамп Украинадағы соғысты тоқтату мәселесі бойынша жаңа мәлімдеме жасады. Мемлекет басшысының айтуынша, Вашингтон жанжалды бейбіт жолмен шешу үшін барлық күш-жігерін жұмсап жатыр.
"Біз келісімге келуге тырысып жатырмыз. Егер ол жүзеге асса - бұл барлығы үшін өте жақсы болады. Бірақ келісім болмаса, көпшілік үлкен баға төлейді," - деді Трамп журналистерге берген сұхбатында.
Оның айтуынша, АҚШ соғысты тоқтатуды басты дипломатиялық мақсат ретінде белгілеген және бұл үдерісте Мәскеумен де, Киевпен де диалогты сақтап отыр.
Сонымен қатар, Трамп Украинаның әзірге жеңіске жетуі мүмкін екенін, бірақ бұл ықтималдық өте төмен екенін айтты. "Украина әлі де жеңіске жетуі мүмкін, бірақ бұл мүмкін емес. Біз барлығын бейбіт жолмен шешуді жақтаймыз," - деді ол.
Ақ үй басшысы Путин мен Зеленский туралы пікірін де ашық айтты. "Олар бір-бірін жек көреді, бұл жағдайды одан әрі қиындатады," - деді Трамп.
Ақпарат үшін, өткен аптада Дональд Трамп Ресей президенті Владимир Путинмен телефон арқылы сөйлесті. Бұл сұхбат 16 октябрьде болған, ал келесі күні Трамп Ақ үйде Украина президенті Владимир Зеленскиймен бетпе-бет кездескен.
Сұхбаттардан кейін АҚШ президенті Путинмен екінші кездесу өткізу ниетін мәлімдеді. Оның айтуынша, бұл саммит Будапештте өтуі мүмкін. Әзірге нақты күн белгіленбеген, бірақ кездесу алдағы апталарда өтеді деп күтілуде.
Саясаттанушылардың пікірінше, Трамптың бұл мәлімдемесі Украина төңірегіндегі дипломатиялық белсенділіктің одан әрі күшейетінін көрсетеді. Сондай-ақ Вашингтон жанжалды ұзақ мерзімді саяси шешімге әкелетін жаңа форматты әзірлеу үстінде.
“Zamin”-ді Telegram-нан оқыңыз!
