Украина президенті Володимир Зеленский АҚШ-тың арнайы өкілі Стив Уиткофф және АҚШ президентінің кеңесшісі Джаред Кушнермен телефон арқылы сөйлескенін мәлімдеді. Мемлекет басшысының айтуынша, әңгіме “өте жақсы және мағыналы” сипатта өткен.
Зеленский 25 желтоқсан күні Х әлеуметтік желісіндегі парақшасында осы әңгіме барысында жұмыстың маңызды тұстары талқыланғанын атап өтті. Оның айтуынша, ортақ нәтижелерге қол жеткізуге және тұрақты бейбітшілік орнатуға мүмкіндік беретін бірқатар конструктивті идеялар бар.
Украина президенті америкалық әріптестеріне ашық әрі іскерлік ұстанымы үшін, белсенді ынтымақтастық, сондай-ақ украиналықтарды Рождество мерекесімен шын жүректен құттықтағаны үшін ерекше алғыс білдірді. Зеленскийдің айтуынша, Киев қазіргі жағдайда тәулік бойы үздіксіз жұмыс жасауда.
— Біз Ресейдің Украинаға қарсы соғысын тоқтатуды жақындату, барлық шешімдер мен құжаттарды шынайы, тиімді әрі сенімді ету үшін толықтай жұмылдырылғанбыз, — деді ол.
Белгілі болғандай, бір күн бұрын Зеленский АҚШ пен Киев арасында келісілген, соғысты тоқтатуға бағытталған жоспардың жаңартылған әрі түпкілікті нұсқасы бойынша нақты келісімдерге қол жеткізілгенін хабарлаған. Қазіргі уақытта бұл құжат Мәскеу тарапынан қарастырылуда.
Украина президенті ұсынған 20 тармақтан тұратын жоспарда қолданыстағы майдан сызығын уақытша “тоқтату” көзделген. Сонымен қатар, құжат әскерді кезең-кезеңімен шегіндіру және демилитаризацияланған аймақтарды қалыптастыру мүмкіндігін ашып береді.
Қорыта айтқанда, Киев дипломатиялық майданда белсенді әрекет етуде. АҚШ-пен жүргізіліп жатқан мұндай келіссөздер соғысты тоқтатуға бағытталған бастамалардың жаңа кезеңге өтетінін көрсетуде.
«Меҳмон» тобындағы келушілер бұл жарияланымға пікір қалдыра алмайды.
