Мәскеудегі Внуково халықаралық әуежайында бірнеше жылдар бойы қолданыста болған заңсыз әуе билеттерін сатуға қатысты алаяқтық схемасы әшкереленді. Белгілі болғандай, 2014 жылдан бері әуежай аумағындағы жалған касса арқылы ресми жүйелерде тіркелмеген әуе билеттері сатылып келген. Нәтижесінде шетелдік азаматтар, соның ішінде Өзбекстан мен Түркия азаматтары да зардап шекті. Бұл туралы MK.RU басылымы хабарлады.
Тергеу органдарының мәліметінше, кассир клиенттерден ақша алып, нақты рейстер үшін ресми ақпарат базаларына енгізілмеген құжаттарды беріп келген. Кейбір жағдайларда түскен қаражат уақытша басқа қажеттіліктерге жұмсалып, кейіннен нақты билеттер қайта сатып алынған. Осылайша, алаяқтық ұзақ уақыт бойы ашылмай қалды.
Алайда кейінгі уақытта бұл схема істен шығып, 20-дан астам клиент ақшасынан да, ұшақ билеттерінен де айырылды. Жәбірленушілер құқық қорғау органдарына жүгінгеннен кейін қылмыстық жағдай анықталды.
Мәскеу қаласының Солнцев аудандық соты осы іс бойынша айыпталушыны кінәлі деп танып, оған 4 жыл 6 айға бас бостандығынан айыру жазасын тағайындады.
Мамандар азаматтарға әуе билеттерін тек ресми кассалар, әуе компаниялардың ресми сайттары немесе сенімді онлайн платформалар арқылы сатып алуды ұсынады. Әйтпесе, алаяқтардың тұзағына түсіп қалу қаупі жоғары екені айтылады.
“Zamin”-ді Telegram-нан оқыңыз!
