Таиланд үкіметі халық денсаулығын қорғау үшін қант тұтынуын азайту науқанын одан әрі күшейтіп жатыр. The Guardian мәліметінше, ақпан айында елдегі тоғыз ірі кофехана желісі сусындардың тәттілігін кемінде екі есеге төмендетуге келісім берген.
Мәселе мынада: Таиланд тұрғындары күніне орта есеппен 21 шай қасық қант тұтынады. Бұл Дүниежүзілік денсаулық сақтау ұйымы ұсынатын тәуліктік мөлшер — 6 шай қасықтан әлдеқайда жоғары. Негізгі “кінәлі” — тәтті сусындар: мұзды тай шайынан бастап, тапиокалы сүтті шайлар мен түрлі “milk” сусындарына дейін.
Салық бар, бірақ бәріне бірдей емес
Таиландта 2017 жылдан бері қаптамадағы сусындарға қант салығы кезең-кезеңімен енгізіліп келеді. Соңғы кезең 2025 жылы іске асырылып, дәл осы қаптамадағы сусындар сегментіне бағытталды.
Нәтиже де байқалды: көптеген өндірушілер жоғары салық мөлшерлемесінен қашу үшін рецептураны өзгертіп, қант мөлшерін азайтты. Алайда көшедегі сатушылар мен кафелерде “орнында” дайындалатын жаңа сусындарға бұл салық қолданылмаған. Мамандардың айтуынша, дәл осы сегмент қант тұтынудың ірі көзі болып қалып отыр, бірақ оны реттеу әлдеқайда күрделі.
Жаңа ереже не береді
Соңғы бастама Таиландтағы ең ірі кафе желілерін қамтиды. Кейбір орындар қазірдің өзінде тұтынушыларға тәттілік деңгейін таңдауға мүмкіндік беріп отыр: 0%, 25%, 50%, 75% және 100%.
Жаңа тәртіпке сәйкес, кейбір сусындардағы “100% тәттілік” бұрынғы “100%” деңгейімен салыстырғанда екі есеге төмен болады. Яғни мәзірде 100% деп тұрса да, дәмі бұрынғыдай “қант бомбасы” болмайды.
