АҚШ әскерилері Ормуз бұғазы маңында Иранның 16 мина қоюшы катерін жойды. Бұл туралы 10 наурызда АҚШ Қарулы күштерінің Орталық қолбасшылығы (CENTCOM) мәлімдеді. Соққылар Иранның аймақтан мұнай таситын кемелер өтетін Ормуз бұғазын миналау ниеті туралы хабарламалардан кейін жасалды. Мұндай tengrinews.kz хабарлайды.
АҚШ президенті Дональд Трамп та өзінің әлеуметтік желісінде Иран кемелерінің жойылғанын растады. Ал CENTCOM катерлерге соққы жасалғаны бейнеленген видеоны жариялады. Таяу Шығыстан мұнай тасымалдау үшін ең маңызды дәліздердің бірі болып табылатын Ормуз бұғазы Израиль мен АҚШ-тың Иранға қарсы соғысы басталғалы бері азаматтық кемелер тарапынан іс жүзінде қолданылмайды.
10 наурыз таңында Ислам революциясы сақшылар корпусы АҚШ пен Израиль шабуылдары жалғасып жатқанда, аймақтан бір литр де мұнай экспортталуына жол бермейтінін мәлімдеді. Осыдан кейін АҚШ барлау қызметіне сүйене отырып, Иранның Ормуз бұғазын миналауға дайындалып жатқаны хабарланды. Дональд Трамп Тегеранды бұл әрекеті үшін бұрын-соңды болмаған салдар күтіп тұрғанын ескертті.
Естеріңізге сала кетейік, Израиль мен АҚШ 28 ақпанда Иранға қарсы ірі шабуылдарды бастаған болатын. Әскери қимылдардың алғашқы күнінде Иранның жоғарғы көшбасшысы аятолла Әли Хаменеи мен бірқатар жоғары лауазымды шенеуніктер қаза тапты. Оның орнын 56 жастағы ұлы Можтаба Хаменеи басты. Бұған жауап ретінде Иран да Израиль аумағы мен АҚШ-тың Таяу Шығыстағы әскери базаларына соққы беруде.
“Zamin”-ді Telegram-нан оқыңыз!
