Ұлыбритания Королі Чарльз III 19 жылдық үзілістен кейін ресми сапармен АҚШ-қа барды. Кеше, 27 сәуір күні ол жұбайы Королева Камилламен бірге Вашингтонға келді.
Оларды Дональд Трамп пен АҚШ-тың бірінші ханымы Мелания Трамп Ақ үйде салтанатты түрде күтіп алды.
Бұл сапар Британия монархының 2007 жылдан бергі АҚШ-қа жасаған алғашқы ресми сапары болып табылады. Сапардың алғашқы күндері дипломатиялық кездесулер мен ресми рәсімдерден басталды.
Бүгін, 28 сәуір күні Чарльз III АҚШ Конгресінің қос палатасы алдында сөз сөйлейді деп жоспарланған. Бұл оқиға тарихи маңызға ие, себебі бұл Британия монархының АҚШ парламентіндегі екінші мәрте сөз сөйлеуі ретінде тіркеледі.
Бұған дейін, 1991 жылы Королева Елизавета II Конгресте сөз сөйлеген болатын.
Сапар бағдарламасы аясында Король мен Королева Нью-Йорк қаласына да барады. Онда олар 2001 жылғы 11 қыркүйектегі лаңкестік оқиғалар құрбандарын еске алу рәсіміне қатысады деп күтілуде.
Аталған сапар АҚШ пен Ұлыбритания арасындағы саяси қарым-қатынастар күрделі кезеңді бастан кешіріп жатқан уақытқа тұспа-тұс келді. Атап айтқанда, Дональд Трамптың Еуропаға қатысты сыртқы саясаты бұл қарым-қатынастарға әсер етіп жатыр деп бағалануда.
Соған қарамастан, АҚШ Президенті Корольдің сапары екі мемлекет арасындағы ынтымақтастықты одан әрі нығайтатынына сенім білдірді.
