Иран парламентінің спикері Мұхаммед Багер Ғолибоф әлеуметтік желідегі парақшасында АҚШ-қа қатысты мысқылды мәлімдеме жасады. Оның пікірлері қысқа уақыт ішінде кеңінен талқыланды.
Ғолибоф өз жазбасында АҚШ аумағында шартты түрде екі қабырға тұрғызу мысалын келтіреді. Оның айтуынша, егер бір қабырға Нью-Йорктен Батыс жағалауға дейін, ал екіншісі Лос-Анджелестен Шығыс жағалауға дейін салынса, олардың жалпы ұзындығы 7 755 шақырымды құрайды.
Алайда ол бұл санның өзі Иранның жалпы шекарасының ұзындығынан шамамен 1 000 шақырымға қысқа екенін ерекше атап өтеді. Осы арқылы ол ықтимал блокада немесе қысым шараларын келеке етіп, «блокадада сәттілік тілеймін» деп мысқылдайды.
Сондай-ақ, ол жазбасының соңында АҚШ шенеуніктерінің бірі Пит Хегсетке жүгініп, шақырым мен миль арасындағы айырмашылықты еске салады: «1 км = 0,62 миль».
Бұл мәлімдеме аясында АҚШ пен Иран арасындағы өткір риторика тағы бір мәрте көрініс тапты. Сарапшылардың пікірінше, мұндай мәлімдемелер екі мемлекет арасындағы саяси қайшылық пен өзара сынның жалғасып жатқанын білдіреді.
