Үндістандағы ғибадатхана мерекесі қайғылы оқиғамен аяқталды. Керала штатында өткен рәсім кезінде піл бақылаудан шығып, бір адамның өмірін қиды.
Мәлім етілгендей, оқиға Ангамали ауданындағы ғибадатхана маңында болған. Мерекеге арнайы әкелінген піл кенеттен агрессивті күйге көшіп, айналасындағыларға шабуыл жасаған.
Салдарынан 40 жастағы Вишну қаза тапты. Айта кетерлігі, ол дәл осы пілді рәсімге алып келген адам болған.
Сондай-ақ, тағы бір азамат — Прадип әртүрлі дәрежедегі жарақаттармен ауруханаға жеткізілді.
Куәгерлердің айтуынша, піл шабуылы кезінде бірқатар автокөлік пен скутер аударылып, аймақта үлкен дүрбелең орын алған. Шамамен екі сағатқа созылған тәртіпсіздіктен кейін жануар арнайы тыныштандырғыш құралдардың көмегімен ұйықтатылды.
Одан кейін піл бақылауға алынып, ғибадатхана жанындағы ағашқа байланды. Бұл жағдай мерекелік шараларда қауіпсіздік шараларын одан әрі күшейту қажеттігін көрсетіп отыр.
