Дональд Трамп ИШИД-тің «ең белсенді террорисі» жойылғанын мәлімдеді

АҚШ Президенті Дональд Трамп ИШИД-тің «ең белсенді террорисі» деп аталған Әбу-Билал әл-Минукидің жойылғанын мәлімдеді. Оның айтуынша, арнайы операция АҚШ пен Нигерия қарулы күштерінің бірлескен әрекетімен жүзеге асырылған.

Трамптың атап өтуінше, әл-Минуки Африкада жасырынып жүріп, американдықтарға қарсы жаңа шабуылдарды жоспарлауды жалғастырған. Президент оның жойылуын ИШИД-тің жаһандық қызметіне берілген елеулі соққы деп бағалады.

«Euronews» мәліметінше, Әбу-Билал әл-Минуки 2018 жылдан бері ИШИД-тің Батыс Африкадағы жетекші қолбасшыларының бірі болған. АҚШ оны 2023 жылы ресми түрде террористер тізіміне енгізген еді.

Әзірге арнайы операцияның нақты орны мен егжей-тегжейі толық ашылған жоқ. Соған қарамастан, Вашингтон бұл операцияны аймақтағы террористік желілерге қарсы маңызды қадам деп санайды.