Ресей күштері Украинаның бірқатар аймақтарына 200-ден астам дронмен шабуыл жасады

29 мамырға қараған түні Ресей күштері Украинаның бірқатар аймақтарына ірі әуе шабуылын жасады. Украина Әуе күштерінің мәліметінше, елдің солтүстік, оңтүстік және шығыс аймақтары нысанаға алынған.

Хабарламада шабуыл кезінде «Искандер-М» баллистикалық зымыраны және 232 Shahed, «Гербера», «Италмас» типті дрондар мен «Пародия» дрон-симуляторлары қолданылғаны айтылған. Олар Ресейдің бірнеше аймағы мен аннексияланған Қырым аумағынан ұшырылғаны хабарлануда.

Украина Қарулы күштерінің мәліметінше, әуе қорғанысы 217 ұшқышсыз аппаратты залалсыздандырған. Сонымен қатар, 14 аймақта баллистикалық зымыран мен дрондардың соққысы, ал бірнеше жерде атып түсірілген дрондардың сынықтары құлағаны тіркелген.