Науаи облысында кезекті қайғылы жол-көлік оқиғасы тіркелді. 2 мамыр күні таңертең болған апат салдарынан екі азамат көз жұмды.
Мәліметтерге сәйкес, оқиға Науаи облысының Қанимах ауданы аумағында, «Қарақ ата» ауылдық азаматтар жиыны арқылы өтетін А-379 Науаи—Үшқұдық автомобиль жолында орын алған.
Алдын ала мәліметтер бойынша, Nexia-3 жеңіл автокөлігі Зарафшан—Науаи бағытында келе жатып, жылдамдықты шамадан тыс асырған. Қауіпті бұрылыста жүргізуші көлік тізгініне ие бола алмай, қарсы бағытқа шығып кеткен.
Салдарынан ол қарсы беттен келе жатқан Scania 114L жүк көлігімен соқтығысқан.
Қатты соққы салдарынан Nexia-3 жүргізушісі мен оның жолаушысы алған ауыр жарақаттарынан оқиға орнында қайтыс болған.
Қазіргі таңда аталған дерек бойынша қылмыстық іс қозғалып, құқық қорғау органдары тарапынан алдын ала тергеу амалдары жүргізілуде.
Айта кетерлігі, соңғы уақытта Науаи облысында адам өлімімен аяқталған жол-көлік оқиғалары жиілеп кетті. Атап айтқанда, қаңтар айында Томды ауданында екі адам қаза тапса, 22 ақпанда Қанимах ауданындағы тағы бір апатта төрт адам көз жұмған болатын.
Сондай-ақ, 22 сәуірде Қармана ауданында оқушылар басқарған көліктің қатысуымен болған жол-көлік оқиғасында бір адам қайтыс болған еді.
Мамандар жүргізушілерді жол қозғалысы ережелерін қатаң сақтауға, әсіресе жылдамдықты асырмауға шақыруда.
