«Реал» тарихындағы ең әсерлі әрі нәтижелі шабуылшылардың бірі саналатын Карим Бензема Мадридтен кеткеннен кейін мансабын Сауд Арабиясында — «Әл-Иттихад» сапында жалғастырып жүр. Алайда, сірә, француз сұрмергенінің «корольдік клубпен» байланысы бәрібір үзілмейтін сияқты.
Журналист Хорхе Пиконның мәліметінше, 38 жастағы Бензема кәсіби мансабын аяқтағаннан кейін «Реал» жүйесінде жаңа рөлде пайда болады. Дереккөзге сай, ол «Реалдың» ресми елшісі ретінде жұмысын бастауы мүмкін. Бұл міндетке клубтың бет-бейнесі болу, ресми іс-шараларға қатысу, бренд пен тарихты халықаралық деңгейде насихаттау кіреді.
Айтуларынша, Карим клуб өкілдерімен өткен келіссөздерде бұл ұсынысқа оң көзқарас танытып, миссияны қабылдауға дайын екенін жеткізген.
Еске салайық, Бензема 2009–2023 жылдары «Реалдың» намысын қорғап, Мадридтегі он төрт жылда 25 жүлде жеңіп алды. Олардың қатарында 5 рет Чемпиондар лигасы және 4 рет Испания чемпиондығы бар. Ол клуб тарихында тек голдарымен ғана емес, шешуші сәттердегі салқынқандылығымен, әріптестерін «ашып» беруімен және көшбасшылық мінезімен де ерекше орын алды.
Қазір шабуылшының «Әл-Иттихадпен» қолданыстағы келісімшарты 2026 жылғы 30 маусымға дейін есептелген. Сонымен қатар бұған дейін саудиялық клуб Бенземаға 2028 жылдың жазыңа дейін жарамды жаңа келісім ұсынғаны туралы хабарлар тараған. Бұдан бөлек, Каримді үлкен футболға жетелеген «Лион» клубы да оны Франция чемпионатына қайта оралып, командаға көмектесуге шақырып жатқаны айтылады.
Қысқасы, Бенземаның алдында бірнеше жол бар: Сауд Арабиясында қалып, келісімін ұзарту ма, Еуропаға қайту ма, әлде мансабын аяқтағаннан кейін Мадридке — «Реалдың» ресми елшісі ретінде қайта келу ме. Бір нәрсе анық: Карим қайда жүрсе де, оның есімі «Реал» тарихындағы ең жарқын беттердің бірі болып қала береді.
“Zamin”-ді Telegram-нан оқыңыз!
