Президент Шавкат Мирзиёев футболдан Өзбекстан ұлттық құрамасымен кездесу өткізді. Мемлекет басшысы АҚШ, Мексика және Канада алаңдарында өтетін Әлем чемпионаты қарсаңында футболшыларды, жаттықтырушылар штабын және бүкіл футбол қауымдастығын тарихи жетістікпен шын жүректен құттықтады.
Президент атап өткендей, Өзбекстан халқы бұл күндерді 34 жыл бойы асыға күтті. Ұлттық құрамамыздың алғаш рет Әлем чемпионатына жолдама алуы спорттағы жеңіс қана емес, бүкіл ел үшін тарихи оқиға болды. Осы тұрғыдан алғанда, бұл футболшыларды Өзбекстан футбол тарихында жаңа парақ ашқан заманымыздың қаһармандары деп атауға болады.
Мемлекет басшысы футболшылардың әрбір ойынға жоғары жауапкершілікпен, мықты дайындықпен және отаншылдық рухпен шыққанын ерекше атап өтті. Олардың жеңіске деген құлшынысы, ерік-жігері және күрескерлігі халқымызға шексіз қуаныш сыйлады. Президент мундиаль жолдамасы иеленген күні өзінің де шексіз толқу мен мақтаныш сезіміне бөленгенін айтты.
«Шынымды айтсам, мундиаль жолдамасы иеленген күні көзіме ұйқы келмеді. Барша отандастарымыз сияқты мен де іштей қуандым, мерекеледім», — деді мемлекет басшысы.
Президент футболшыларға, оларды өсірген ата-аналарға, ұстаздар мен жаттықтырушыларға алғыс білдірді. Өйткені бұл жетістік тек алаңдағы 11 футболшының емес, жылдар бойы жасалған еңбектің, сабырдың, тәрбие мен сенімнің жемісі.
Кездесуде мәдениет, әдебиет және өнер өкілдері де қатысқаны атап өтілді. Мемлекет басшысы ақындар, жазушылар мен өнерпаздар футболшылардың ерлігінен шабыттанып, жаңа өлеңдер, шығармалар, әндер мен әнұрандар жазып жатқанын атап өтті. Бұл құрамамыздың жетістігі спорттан тыс, бүкіл қоғамға рух пен шабыт беріп жатқанын көрсетеді.
Сондай-ақ, кәсіпкерлер де футболшылардың табысы арқылы ұлттық брендтерді әлемге таныту, жаңа нарықтарға шығу және Өзбекстан атын халықаралық алаңда одан да кеңірек насихаттау мүмкіндігіне ие болып жатқаны айтылды. Демек, ұлттық құраманың мундиальға шығуы тек спортқа ғана емес, экономикаға, мәдениетке және жастардың рухына да оң әсер етуде.
Президент футболшылардың жастар үшін нағыз үлгіге айналғанын да ерекше атап өтті. Бүгін елімізде «мен де атақты футболшы боламын» деген балалардың қатары артып келеді. Бұл футболдың тәрбиелік, рухани және әлеуметтік әсерінің қаншалықты зор екенін көрсетеді.
Соңғы жылдары спорт, әсіресе футбол инфрақұрылымын дамыту бойынша үлкен жұмыстар атқарылды. Жергілікті жерлерде 200-ден астам ірі спорт нысандары, 4 мыңға жуық жеке спорт клубтары жұмысын бастады. 1,5 мыңнан астам махаллада спорт алаңдары салынды. Ташкентте заманауи Олимпиада қалашығы бой көтерді, Жоғарғы Шыршықта «Ұлттық футбол орталығы» жұмысын бастады. Әрбір облыста кәсіби футбол академиялары мен футбол мектептері ұйымдастырылды.
Бұл жұмыстардың нәтижесінде әуесқой футболшылар саны 5 миллионға жетті. Футболмен тұрақты шұғылданатындар 1 миллион 300 мыңнан асты, кәсіби футболшылар саны 17 мыңға жетті. Ең бастысы, футболда сыбайлас жемқорлық пен таныс-тамырлық сияқты кеселдерге қарсы күрес күшейтіліп, ашық және мөлдір жүйе құрылғаны атап өтілді. Дәл осы орта нағыз таланттарды үлкен алаңға алып шығуда.
Мемлекет басшысы футболды тек кәсіби спорт түрі емес, жастар тәрбиесі, салауатты өмір салты, тәртіп пен отаншылдық мектебі ретінде бағалады. Осы мақсатта «Әрбір махалла — футбол алаңы» бағдарламасы басталатыны мәлім болды. Бұл бастама жалпыұлттық қозғалысқа айналады деп күтілуде.
Бағдарлама аясында «Махалла лигасы» ұйымдастырылады. Онда 12-17 жастағы ұл-қыздар арасында махалла футбол командалары құрылады. Жыл сайын «махалла — аудан — облыс — республика» кезеңдерінен тұратын жарыстар өткізіледі. Бұл жоба болашақта кәсіби клубтар үшін дарынды футболшыларды іріктеуде дайын база қызметін атқарады.
Кездесуде құрамамен атақты маман Фабио Каннаваро бастаған жаттықтырушылар штабы жұмыс істеп жатқаны да атап өтілді. 2006 жылғы Әлем чемпионатында Италия құрамасының капитаны ретінде чемпион болған Каннаваро өз мансабында «Алтын доп» жүлдесін де иеленген азғантай қорғаушылардың бірі саналады. Президент оны жаттықтырушы ретінде мундиальдағы алғашқы қатысуымен құттықтап, жаттықтырушылар штабына жаңа жеңістер тіледі.
«Орайдан пайдаланып, Фабио Каннавароныжаттықтырушы ретінде мундиальдағы алғашқы қатысуымен құттықтап, жаттықтырушылар штабына жаңа жеңістер тілеймін», — деді мемлекет басшымыз.
Каннаваро командаға дене дайындығы, шабуылшылармен жұмыс, медициналық қызмет, нутрициология және тамақтану бағытында халықаралық тәжірибесі бар мамандарды тартқаны да мойындалды. Бұл Әлем чемпионаты сияқты үлкен жарыс алдында құрама дайындығын одан да кәсіби деңгейге көтереді.
Президент футболшыларға сөз арнап, мундиальда оңай ойын болмайтынын атап өтті. Өзбекстан Португалия, Колумбия және Конго сияқты құрамаларға қарсы алаңға шығады. Табиғи түрде халық әрбір ойында жеңіс күтеді. Бірақ мемлекет басшысы футболшылар тарихты әлдеқашан жасап қойғанын, енді алаңға артық қысымсыз, ешкімнен қаймықпай шығу керектігін айтты.
«Енді футболшыларға қаратып айтқым келеді: әлем чемпионатында оңай ойынның өзі жоқ. Сіздер Португалия, Колумбия, Конго сияқты құрамалармен ойнайсыздар. Халқымыз әрбір ойында сіздерден жеңіс күтуі табиғи, әрине.
Бірақ бір нәрсені әрдайым естен шығармаңыздар: сіздер тарихты әлдеқашан жасап қойдыңыздар!
Алдарыңызда тұрған маңызды кездесулерде артық қысымсыз, ешкімнен қаймықпай, барыңызды салып ойнаңыздар. Әрбір доп, әрбір жағдаят, алаңның әрбір қарыс жері үшін соңына дейін күресіңіздер!» — деді Президент.
Мемлекет басшысы Әлем чемпионатында құрамамызды фан-клубтар, мыңдаған жанкүйерлер және Америкадағы отандастарымыз стадиондардан қолдайтынын атап өтті. Сонымен бірге, 40 миллионға жуық халқымыз әрбір ойынды экран артынан үлкен толқумен бақылайды. Бұл футболшылар үшін үлкен жауапкершілік, бірақ сонымен бірге теңдессіз күш көзі де.
Қысқасы, Президенттің құрамамен кездесуі футболшылар үшін үлкен рухани демеу болды. Өзбекстан алғаш рет Әлем чемпионаты жолына түсуде және бұл жолы тек қатысу үшін емес, Отан намысын лайықты қорғау үшін алаңға шығады. Халық сенеді, Президент сенеді, енді кезек футболшыларда: барын салу, ерлікпен ойнау және Өзбекстан атын әлем алаңында биік шырқату.
“Zamin”-ді Telegram-нан оқыңыз!
