Жиында Мемлекет басшысы жасанды интеллект саласында кадрлар даярлау мәселесіне ерекше тоқталды. Оның айтуынша, бұл бағыттағы жетістік тек заманалық инфрақұрылымға немесе озық алгоритмдерге ғана емес, терең білім мен біліктілікке ие мамандарға да байланысты. "Жасанды интеллектінің негізі - математика және информатика. Сондықтан кадрларды даярлау мектеп сатысынан басталуы керек," - деді Президент.
Келесі оқу жылынан бастап "Информатика" пәнінің бағдарламаларына жасанды интеллектке қатысты жаңа тақырыптар енгізіледі. Осы мақсатта Массачусетс технологиялық институтымен бірлесіп арнайы оқулық жасау жоспарлануда.
Мемлекет басшысының айтуынша, "Жаңа Өзбекстан" университетінде биылдың өзінде 100 адам, келесі жылы 1300 жасанды интеллект бойынша жаттықтырушы-оқытушы даярланады. Олар өз кезегінде мектептер мен жоғары оқу орындарындағы информатика мұғалімдеріне заманауи білім беруі белгіленген.
Жыл сайын ең белсенді және нәтижелі 100 информатика мұғалімі әлеуетті мамандар қатарынан таңдалып, жасанды интеллект дамыған елдерде біліктілігін арттыру мүмкіндігіне ие болады.
Сонымен қатар, "Бір миллион өзбек бағдарламашысы" бағдарламасының логикалық жалғасы ретінде "Бір миллион жасанды интеллект көшбасшысы" жобасы іске қосылды. Оның аясында биыл 100 мың, ал келесі жылы кемінде 500 мың жас жасанды интеллект негіздерін үйренуі көзделген.
Президент атап өткендей, жоба мектеп оқушыларын да қамтиды. Жыл сайын жасанды интеллект бойынша ұлттық байқау өткізіліп, ең жоғары нәтиже көрсеткен жастар, олардың ұстаздары мен оқу орындары лайықты марапатталады.
Бұл байқауда жеңіске жеткен 500 жасқа ноутбук, 100 мұғалімге 1 мың доллар сыйақы, сондай-ақ екі білім беру ұйымына электромобиль беріледі.
Шавкат Мирзияевтың айтуынша, "Жасанды интеллект технологиялары болашақ дамуының негізгі күші болады, бұл үдеріске ерте қосылған халық - жетістікке жетеді."
“Zamin”-ді Telegram-нан оқыңыз!
