Spotify платформасы пайдаланушылар үшін подкасттарды жай ғана тыңдау орны емес, оларды жасау алаңына айналдыруды көздеп отыр. Компания пайдаланушының идеясы немесе арнайы пәрмені (промпт) негізінде жасанды интеллект көмегімен жеке подкасттар жасау функциясын енгізуде. Жақын арада пайдаланушылар тікелей Spotify қосымшасының ішінде күнделікті немесе апталық қысқаша шолулар, сондай-ақ белгілі бір тақырыптарды түсінуге көмектесетін аудио материалдар жасау мүмкіндігіне ие болады. Бұл туралы Techcrunch.com хабарлайды.
Жаңа жүйе арқылы пайдаланушылар «Экономиканы бес минутта түсіндіріп бер» немесе «Сүйікті әртістерімнің концерттері туралы ақпарат бер» сияқты сұраныстар жібере алады. Сондай-ақ, подкаст жасау үшін сілтемелер, PDF файлдар мен мәтіндерді жүктеу, тіпті дауыс түрін таңдау мүмкіндігі бар. Бұл ретте Spotify NotebookLM және ElevenLabs сияқты технологиялардан үлгі алуда. Сонымен қатар, пайдаланушының электронды поштасы мен күнтізбесіне қосылып, жеке есептер дайындайтын Studio by Spotify Labs жұмыс үстелі қосымшасы да ұсынылды.
АҚШ, Швеция және Ирландиядағы Premium жазылушылары үшін подкасттар бойынша жасанды интеллекті бар сұрақ-жауап (Q&A) функциясы іске қосылды. Енді тыңдаушылар подкаст барысында айтылған түсініктер туралы сұрақ қоя алады немесе қызықты тақырыптар бойынша ұсыныстар ала алады. Бұл функция Google жақында ұсынған Ask YouTube қызметіне ұқсас және пайдаланушылардың контентпен белсендірек қарым-қатынас жасауын қамтамасыз етеді.
Подкаст авторлары үшін де жаңалықтар бар: Spotify брендтермен ынтымақтастықты басқару үшін демеушілік құралдарын және эксклюзивті контенттер үшін ақылы жазылу жүйесін енгізуде. Мұндай мүмкіндіктер бұған дейін Instagram, Facebook және Snap сияқты әлеуметтік желілерде жолға қойылған болатын. Компания мәліметтері бойынша, видео подкасттарды тұтыну өткен жылмен салыстырғанда 50 пайызға өсті және жаңа AI функциялары бұл өсімді одан әрі жеделдетеді деп күтілуде.
“Zamin”-ді Telegram-нан оқыңыз!
