Шавкат Мирзияев Ақ үйде Дональд Трамппен кездесу өткізді (фото)

Өзбекстан Республикасының Президенті Шавкат Мирзиёев 6 қарашада Вашингтонға жұмыс сапары аясында Ақ үйде Америка Құрама Штаттарының Президенті Дональд Трамппен кездесу өткізді.

Президент алдымен Ақ үйдің Құрметті қонақтар кітабына жазба қалдырды.

Содан кейін Овалды бөлмеде көшбасшылар келіссөздер жүргізді. Өзбекстан мен АҚШ арасындағы стратегиялық серіктестік қатынастарын одан әрі дамыту, саяси диалогты нығайту, сауда-экономикалық, инвестициялық және мәдени-гуманитарлық ынтымақтастықты кеңейту мәселелері талқыланды.

Биылғы жылдың қыркүйек айында Нью-Йорк қаласында жоғары деңгейде қол жеткізілген келісімдерді жүзеге асыруға ерекше назар аударылды.

Жаһандық және өңірлік маңызы бар өзекті мәселелер, оның ішінде "С5+1" форматында Орталық Азия мен АҚШ арасындағы ынтымақтастықты тереңдету жөнінде пікір алмасылды.

Мемлекет басшысы Дональд Трампты ішкі және сыртқы саясаттағы жоғары жетістіктерімен шын жүректен құттықтады. Оның өткір халықаралық және аймақтық қақтығыстарды бейбіт жолмен шешудегі жеке үлесі мен күш-жігері ерекше атап өтілді.

Дональд Трамп Өзбекстан басшысы осы күндері АҚШ үкіметінің өкілдерімен, ірі компаниялары мен қаржы институттарының басшыларымен нәтижелі кездесулер мен келіссөздер өткізгенін құптады.

Көшбасшылар бірлескен жобаларды ілгерілетудің институционалдық тетіктерін құру және жетілдірудің маңыздылығын атап өтті.

Кездесу соңында Мемлекет басшысы АҚШ басшысын өзіне ыңғайлы мерзімде Өзбекстанға ресми сапармен келуге шақырды.