НТВ телеканали томонидан тақдим этилган янги детектив сериал — "Махфий маслаҳатчи" — эфирга чиққан илк кунлариданоқ томошабинлар эътиборини ўзига жалб қилди ва қисқа вақт ичида катта муҳокамаларга сабаб бўлди. Лойиҳа “Кинопоиск” платформасида ўртача 7,5 балл билан баҳоланиб, томошабинлар орасида ижобий фикрлар тўлқинини юзага келтирди. Асосий устунликлардан бири эса — сериалнинг барча 20 қисми бир вақтнинг ўзида намойишга қўйилганидир.
Сюжет марказида Москва шаҳри жиноятчиликка қарши кураш бўлимида хизмат қилган тажрибали ходим Павел Костиков туради. У хавфли махсус операция чоғида “Жаллод” лақабли қотилни қўлга олиш пайтида оғир жароҳат олади, унинг яқин шериги Дмитрий Смирнов эса ҳалок бўлади. Бу воқеа қаҳрамон ҳаётида чуқур из қолдиради.
Узоқ даволанишдан кейин Костиков хизматга қайтса-да, аввалги бўлимда ишлаш имкониятидан маҳрум бўлади ва ахборот-таҳлил бўлимига ўтказилади. Янги лавозим унга осон кечмайди: нафақат касбий, балки руҳий жиҳатдан ҳам жиддий синовлар кутиб туради.
Костиков ўзини шеригининг беваси — адвокат Полина Смирнова олдида айбдор ҳис қилади. Унга нисбатан кўпдан бери илиқ туйғуларни яширмайди. Полина эса навбатдаги мураккаб қотиллик ишида ҳимояни ўз зиммасига олиб, айбланувчининг бегуноҳ эканига қатъий ишонади.
Шундан сўнг Костиков норасмий тарзда терговга киришади ва олиб борилган изланишлар натижасида Полинанинг ҳақ эканини исботлайди. Гумондор оқланади, ҳақиқий жиноятчи эса фош этилади. Шу воқеадан кейин адвокат ва собиқ терговчи ўртасида норасмий, аммо самарали ҳамкорлик йўлга қўйилади.
Костиков Полинанинг “махфий маслаҳатчиси”га айланиб, унга мураккаб ишлар бўйича муҳим маълумотлар билан ёрдам беради. Икки қаҳрамоннинг тақдир йўллари нафақат касбий, балки шахсий жиҳатдан ҳам чамбарчас боғланиб боради.
Сериал “Кинопоиск”да 7,6, “Кино-Театр.РУ” сайтида эса 7,3 балл тўплаган. Томошабинлар актёрлик ижроси, воқеаларнинг кескин ва қизиқарли ривожи, қаҳрамонларнинг инсон сифатидаги заиф ва кучли жиҳатлари маҳорат билан очиб берилганини алоҳида эътироф этмоқда.
Айни пайтда сериалнинг барча 20 қисми “ИВИ” онлайн кинотеатри орқали томоша қилиш учун очиқ. "Махфий маслаҳатчи" классик телевизион детектив услубини замонавий стриминг формати билан уйғунлаштира олган, мазмунли сюжет ва барқарор интригага эга лойиҳа сифатида мухлислар сонини изчил ошириб бормоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
