ПСЖнинг собиқ бош мураббийи Маурисио Почеттино юлдуз футболчилар билан ишлашнинг мураккаб жиҳатлари ҳақида фикр билдирди. Аргентиналик мутахассис Парижда ишлаган даврида ҳужумда Лионел Месси, Неймар ва Килиан Мбаппе учлиги тўп сурган эди. Бу ҳақда euro-football.ru хабар беради.
Почеттинонинг таъкидлашича, бундай даражадаги футболчилар билан ишлаш ҳар доим ҳам оддий кечмайди: улар баъзан ўйнаётган клубидан ҳам каттароқ эътиборга эга бўлади. Мураббий Месси мисолида прессинг мавзусини кўтарди — унинг айтишича, Лионел ҳеч қачон фаол прессинг қилмаган, ҳатто Гвардиола қўл остидаги энг яхши йилларида ҳам. Шу сабаб, натижа бўлмаса, кўпинча айб мураббий зиммасига юкланади, дея Почеттинонинг сўзларини The Touchline келтирди.
Айни пайтда Маурисио Почеттино АҚШ терма жамоасини жаҳон чемпионатига тайёрламоқда. ОАВда эса аргентиналик мутахассис ёзда яна “Тоттенҳем”га қайтиши мумкинлиги ҳақида миш-мишлар тарқалган.
“Zamin”ни Telegram'да ўқинг!
