Япониянинг Мие университети олимлари генетика соҳасида муҳим илмий кашфиётга эришишди. Доктор Ретаро Хасидзумэ бошчилигидаги гуруҳ Даун синдромини келтириб чиқарадиган ортиқча хромосомани олиб ташлашга муваффақ бўлди. Бу ҳақда Peopletalk нашри хабар берди.
Олимлар замонавий CRISPR технологияси ёрдамида инсон геномидаги муаммоли 21-хромосомани аниқлаб, уни олиб ташлаш бўйича муваффақиятли тажриба ўтказишди. Шу орқали ҳужайралардаги нормал фаолият тиклана бошлади ва асаб тўқималарида ижобий ўзгаришлар кузатилди. Мутахассислар бу жараённи мия фаолияти яхшиланиши билан боғлашмоқда.
Тадқиқотчиларга кўра, ушбу ютуқ — нафақат генетика соҳаси, балки неврология ва ихтисослашган тиббиёт учун ҳам катта қадамдир. Бу даво шакли муаммонинг туб сабабига — ортиқча хромосомага бевосита таъсир кўрсата олади.
Шу билан бирга, мутахассислар бу усул ҳали тўлиқ ўрганилмаганини, шу боис у амалиётда қўлланишга тайёр эмаслигини алоҳида таъкидлашмоқда. Асосий хавф — геном таҳрири вақтида бошқа, соғлом хромосомаларга тасодифий шикаст етказиш эҳтимоли.
Яъни бугунги кунда технология катта илмий салоҳиятга эга бўлса-да, уни инсонда қўллашдан аввал яна кўплаб текширувлар, хавфсизлик синовлари талаб этилади.
«Замин»ни Telegram’да ўқинг!
