O‘zbekiston Sog‘liqni saqlash vazirligi 1486 ta dori vositasini retseptsiz sotishga ruxsat berilgan dorilar ro‘yxatini e’lon qildi. Endi bemorlar ushbu ro‘yxat orqali qaysi dorilarni erkin xarid qilishi mumkinligini bilib olishlari mumkin.
Ro‘yxatga og‘riq qoldiruvchi, shamollashga qarshi vositalar, antiseptiklar hamda vitamin komplekslari kabi mashhur dori vositalari kiritilgan. O‘zbekistonda 12 dekabrdan boshlab elektron retseptlar tizimi joriy etilgan hukumat qarori kuchga kirdi.
Ammo tizimning ishga tushishi bilan Toshkent shahridagi dorixonalarda dorilarni xarid qilishda muammolar kuzatilgan. Ijtimoiy tarmoqlarda paratsetamol, etil spirt, nimesil va aspirinni faqat retsept asosida olish mumkinligi, retseptsiz esa faqat vitaminlar va biologik faol qo‘shimchalar sotilayotgani haqida xabarlar tarqaldi.
Foydalanuvchilar dorixonalarda navbatlar ko‘payishi, tizimda nosozliklar yuzaga kelishi va korrupsiya holatlari ortishi mumkinligidan xavotir bildirgan. Keyinchalik Sog‘liqni saqlash vazirligi mazkur holat yuzasidan izoh berib, elektron retseptlar tizimining asosiy maqsadi davolanish xavfsizligini oshirish, dori vositalarini tayinlashni nazorat qilishni kuchaytirish hamda dorilarning noto‘g‘ri yoki noqonuniy muomalasini kamaytirish ekanini ta’kidladi.
Hozircha tizim Toshkentda va yana 15 ta tajriba hududida joriy etilgan. Ushbu tizim 2026 yil oxirigacha butun mamlakat bo‘ylab kengaytirilishi rejalashtirilgan.
Shoshilinch holatlarda, shuningdek, bolalar, keksalar va surunkali kasalliklarga chalingan bemorlarni davolashda dori vositalari qo‘shimcha cheklovlarsiz beriladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
