Yagona ijtimoiy reestr 1-fevraldan ishga tushadi
0
2026 yil 1 fevraldan boshlab mamlakatda aholiga ijtimoiy yordamni hisobga olish va taqsimlashda yangi bosqich boshlanadi: endilikda yagona ijtimoiy reestr yuritiladi. U “Ijtimoiy himoya yagona reestri” hamda Kambag‘al oilalar reestri negizida shakllantiriladi.
Yangi tizim “Yagona milliy ijtimoiy himoya” axborot platformasida yuritiladi. Uning asosiy vazifasi — davlat ijtimoiy qo‘llab-quvvatlash choralari taqdim etiladigan oilalar va shaxslarni aniqlash, shuningdek, ularning ijtimoiy-iqtisodiy holatini xolis baholashdan iborat. Shu orqali yordamni “kimga kerak — o‘shanga” tamoyili asosida manzilli tashkil etish, ehtiyojmandlarni baholashda esa yagona yondashuvni joriy qilish ko‘zda tutilmoqda.
Ma’lum qilinishicha, ushbu ijtimoiy reestrda oilalar (shaxslar) uch toifaga ajratiladi:
- davlat ta’minotidagi oila — davlat tomonidan belgilangan ta’minot asosida qamrovga olingan oilalar;
- kambag‘al oila — ijtimoiy-iqtisodiy ko‘rsatkichlariga ko‘ra kambag‘al deb baholangan oilalar;
- kambag‘allik chegarasidagi oila — kambag‘allikka yaqin bo‘lgan, xavf guruhidagi oilalar.
Yagona reestrning joriy etilishi ijtimoiy himoya tizimidagi ma’lumotlarni bir joyga jamlash, baholash mexanizmlarini tartibga solish va davlat yordamini maqsadli ravishda taqdim etish samaradorligini oshirishga xizmat qilishi kutilmoqda. Qisqasi, “ma’lumot tarqoq — yordam kechikib keladi” degan muammo endi sekin-sekin yo‘qolishi mumkin.
“Zamin”ni Telegramʻda oʻqing! 
