Qashqadaryo viloyatida shifokorlar kam uchraydigan, lekin juda xavfli holatga duch keldi: 20 yoshli bemor qiz oshqozonidan qariyb 1,5 kilogrammga yaqin soch tolalari operatsiya yo‘li bilan olib tashlandi. Viloyat Sog‘liqni saqlash boshqarmasi matbuot xizmati ma’lum qilishicha, gap Qarshi tumanida yashovchi, 2005 yilda tug‘ilgan bemor haqida ketmoqda.
Qayd etilishicha, bemor avvaldan “D” hisobda turgan va ushbu muammo bilan tibbiyot muassasasiga ikkinchi marotaba murojaat qilgan. Unda qorinning yuqori qismida og‘riq, shish, ko‘ngil aynishi, qusish kabi belgilar kuzatilgan. Shu sababli viloyat ko‘p tarmoqli tibbiyot markazida mutaxassislar jamoasi tomonidan tezkor tekshiruvlar o‘tkazilib, jarrohlik amaliyoti amalga oshirilgan.
Shifokor M. Pardaev boshchiligidagi jarrohlar amaliyot vaqtida bemor oshqozonida katta hajmli soch to‘plami — trixobezoar borligini aniqlagan. U to‘liq holda olib tashlangan. Olingan soch to‘plamining uzunligi 58 santimetr, eni 7 santimetr bo‘lib, og‘irligi 1 kilogramm 400 grammni tashkil etgan.
Mutaxassislar xulosasiga ko‘ra, bu holat bir kunda paydo bo‘lib qolmaydi: sochni uzoq yillar davomida yutib borish natijasida shunday katta massa shakllanishi mumkin. Eng e’tiborli jihati — mazkur holat bemorda ikkinchi bor qayd etilgan. Avvalroq ham unga xuddi shunday vaziyat sabab fitobezoar tashxisi bilan laparotomiya va gastrotomiya turidagi jarrohlik amaliyoti o‘tkazilgani aytilmoqda.
Ayni paytda bemorning ahvoli barqaror, u shifokorlar doimiy nazorati ostida davolanmoqda. Bunday holatlar yana takrorlanmasligi uchun bemorga jarroh, gastroenterolog va psixiatr ishtirokida kompleks kuzatuv tavsiya etilgan. Ya’ni bu yerda masala faqat oshqozon emas — sabablar chuqurroq bo‘lishi mumkin, shuning uchun davolash ham jamoaviy yondashuvni talab qiladi.
Eslatib o‘tamiz, bundan oldin Samarqandda stress ortidan 200 gramm mix yutib yuborgan 29 yoshli fuqaro haqida ham xabar tarqalgan edi. Tekshiruvlar davomida uning oshqozon-ichak tizimida mix va samorez kabi metall jismlar ko‘p miqdorda borligi aniqlangan.
Bu ikki holat ham bir narsani eslatadi: organizm “hammasini ko‘taraveradi” degan fikr — eng xatarli mif. Agar qorin sohasida og‘riq, ko‘ngil aynishi, qusish, ishtaha yo‘qolishi kabi belgilar tez-tez qaytarilayotgan bo‘lsa, vaqtni cho‘zmasdan shifokorga murojaat qilish kerak. Erta harakat — og‘ir asoratlarning oldini oladi.
