«O‘zbekneftgaz» AJ boshqaruvi sobiq raisi Bahodir Siddiqov ehtiyot chorasi sifatida qamoqqa olindi. Kun.uz manbasiga ko‘ra, u davlat mablag‘larini talon-toroj qilish hamda boshqa korrupsiyaviy qilmishlarda gumon qilinmoqda.
Bugun, 27 yanvar kuni prezident raisligida o‘tgan yig‘ilishda «O‘zbekneftgaz» tizimida keng ko‘lamli taftish ishlari olib borilayotgani aytildi. Ma’lum qilinishicha, tekshiruv jarayonida milliardlab so‘mga teng mablag‘lar yo‘qotilgani, yirik hajmdagi talon-torojlik holatlari aniqlangan.
Yig‘ilishda DXX raisiga «O‘zbekneftgaz» AJ bo‘yicha mas’ul bo‘lgan xodimlarning javobgarligini ko‘rib chiqish vazifasi qo‘yilgani ham qayd etildi. Ya’ni masala faqat bir-ikki shaxs bilan cheklanib qolmay, butun tizimdagi mas’uliyat zanjirigacha yetib borishi mumkin.
Eslatib o‘tamiz, o‘tgan yil dekabr oyi o‘rtalaridan buyon energetika sohasida kadrlar bo‘yicha ham keskin o‘zgarishlar kuzatilgan. Avval O‘zbekiston prezidentining energetik xavfsizlik bo‘yicha vakili Alisher Sultonov, keyin esa «O‘zbekneftgaz» rahbari Bahodir Siddiqov lavozimidan ozod etilgandi.
Ma’lumot uchun, Alisher Sultonov 2013–2015 yillarda «O‘zbekneftgaz» raisi o‘rinbosari, 2015–2018 yillarda esa shirkat raisi sifatida ishlagan. 2017-yildan bosh vazir o‘rinbosari maqomida geologiya, yoqilg‘i-energetika kompleksi, kimyo, neft-kimyo va metallurgiya sanoati yo‘nalishlariga rahbarlik qilgan. 2019–2022 yillarda energetika vaziri bo‘lgan, keyinroq prezident maslahatchisi lavozimiga o‘tgan.
Bahodir Siddiqov esa 2019–2020 yillarda ham «O‘zbekneftgaz»ni boshqargan, 2023 yilda mazkur lavozimga qayta tayinlangandi. 2025 yil dekabrida iste’foga chiqqan paytda «boshqa ishga o‘tayotgani» aytilgan edi.
Hozir esa taftish natijalari va tergov harakatlari fonida ushbu ish nafaqat soha, balki jamoatchilik uchun ham diqqat markazida qolishi tabiiy. Chunki gap oddiy raqamlarda emas — davlat mablag‘i, ishonch va javobgarlik haqida ketyapti.
“Zamin”ni Telegramʻda oʻqing!
