Foto: DXX
Samarqand shahrida yer uchastkasini qonunga zid ravishda sotishga urinish holati fosh etildi. Bu haqda Davlat xavfsizlik xizmati maʼlum qildi.
Maʼlum boʻlishicha, 1993 yilda tugʻilgan shaxs Samarqand tumanida yashovchi, 1983 yilda tugʻilgan fuqaro bilan til biriktirib, uning turmush oʻrtogʻiga issiqxona qurish uchun ajratilgan 2 gektar yer maydonini sotishni rejalashtirgan.
Gumonlanuvchi ushbu yerni xaridorga 490 ming AQSH dollariga taklif qilib, goʻyo mansabdor tanishlari orqali barcha hujjatlarni rasmiylashtirib berishini aytgan. Shu bilan birga, u kelishuv uchun oldindan 50 ming dollar talab qilgan.
Huquqni muhofaza qiluvchi organlar — Davlat xavfsizlik xizmati, Iqtisodiy jinoyatlarga qarshi kurashish departamenti hamda ichki ishlar idoralari hamkorligida oʻtkazilgan tezkor tadbirda mazkur shaxs pul mablagʻini olayotgan paytda ashyoviy dalillar bilan qoʻlga olindi.
Hozirda ushbu holat yuzasidan jinoyat ishi qoʻzgʻatilgan boʻlib, tergov jarayonlari davom etmoqda. Mutaxassislar taʼkidlashicha, yer uchastkalarini ajratish va sotish faqat qonunchilik asosida amalga oshirilishi shart.
Xususan, bu kabi jarayonlar faqat E-AUKSION elektron savdo platformasi orqali ochiq va shaffof tarzda oʻtkazilishi lozim.
Qisqacha aytganda, oson pul topishga urinish yana bir jinoyat bilan tugadi. Qonunni aylanib oʻtishga uringan har qanday harakat baribir fosh boʻladi — va oqibati ogʻir boʻladi.
“Zamin”ni Telegramʻda oʻqing!
