"Real Madrid" hujumchisi Endrikning otasi Duglas Sousa o'g'lining Ispaniya klubidagi faoliyati haqida keskin fikr bildirdi. Uning so'zlariga ko'ra, Madrid klubi rahbariyati 19 yoshli braziliyalik iqtidor egasini o'zi uchun eng qadrli bo'lgan narsa — futbol o'ynash imkoniyatidan mahrum qilgan. Bu haqda Goal.com xabar beradi.
Endrik Madridda Xabi Alonso qo'l ostida yetarli o'yin amaliyotiga ega bo'lmagach, qishki transfer oynasida Fransiyaning "Lion" klubiga ijaraga berilgan edi. Duglas Sousa o'g'lining Ispaniyadagi holatini «uning o'yin maydonchasini olib qo'yishdi» deya ta'rifladi.
Shuningdek, futbolchining otasi ushbu transferda Endrikning rafiqasi Gabrieli Mirandaning o'rni katta bo'lganini oshkor qildi. Aynan rafiqasining maslahati va muzokaralardagi ishtiroki braziliyalik yulduzning Fransiya chempionatini tanlashiga sabab bo'lgan.
Fransiyada Endrik o'zining eng yaxshi formasiga qaytdi va 18 ta uchrashuvda 7 ta gol hamda 7 ta golli uzatmani amalga oshirdi. Ayniqsa, "PSJ"ga qarshi bahsdagi samarali harakatlari mutaxassislar e'tiborini tortdi.
Duglas Sousaning ta'kidlashicha, o'g'li hozirda baxtli va 2026-yilgi jahon chempionatida Braziliya terma jamoasi safida maydonga tushishni maqsad qilgan. Uning fikricha, Endrikning hozirgi o'yini Karlo Anchelotti uchun ham jiddiy signal bo'lishi lozim.
“Zamin”ni Telegramʻda oʻqing!
